Hoe dat hertoghe Govert verradelick verslegen wert, ende van biscops Willems doot van Uutrecht.
Dat IX capittel.
Onlanxs hierna, als int jaer M ende LXXV, hertoghe Govert wesende tot Antworpen, worde hi sittende op een privaet ofte heimelicheit van eene van joncheer Dircs knechten van Hollant, genoemt Ghijsbrecht, van onderop mit een gavelijn in zijn lijf gesteken; ende dede hem van stonden an voeren tot in der stede van Maestricht, daer hi op dye vijfte calende van maerte ghestorven is, ende en liet geen kinder after. Mer hi hadde een suster, geheten Yde, die te man hadde den grave Eustays van Boloys, dair si bi hadde III sonen, als hertoge Govert van Bullioen, Baldewijn ende Eustaes. Ende als hertoge Govert mitten Buyl sonder kinder gestorven was, worde dese hertoge Govert van Bullioen hertoech van Lottringen oft van Brabant, mer si en hadden den naeme van Brabant doe ter tijt noch niet angenomen, dye van den grote hertoge Govert gecomen waren; mer hierna, int jaer M II C ende LI, doen screef hem hertoge Henric die III, deerste hertoge van Brabant. Dese hertoge Govert van Bullioen wert gerekent voer een van den IX den besten ende vroemste ridderen.
Int jaer van LXXV, op die V kalende van mey, starf oec mede bisscop Willem van Uutrecht, als hi dat bisdom mit groter eren ende mit groten oerloge hadde berecht XXI jaer lang. Ende wert ghevoert tot Uutrecht, ende aldaer in den Domkercke mit groter eren by sijnen voervaderen begraven.
Auteursrechtelijk beschermd