Hoe dat hertoge Govert mitten Buyl onder hem brochte West-Vrieslant, mit allen sinen steden ende dorpen.
Dat VIII capittel.
Hertoge Govert siende dat hem die fortune ende avonture medeghing, nam op onder sine subjectie te brengen dye West-Vriesen, ende heeft een groot machtich heer vergadert, ende is gecomen in Vrieslant, rovende, vangende ende slaende alle dat lant doer, ende is mit enen groten swaren roef van gevangen van beesten ende andere dingen gecomen binnen Alcmaer. Dit vernemende die Oest-Vriesen, quamen mit groter macht ende beleyden Alcmaer alomme IX weken lang. Hertoge Govert siende dat hi tegen dit wrede volc van groter machte die stede niet houden en mochte, screef hi an bisscop Willem van Uutrecht dat hi hem ontset dede ende hem te hulpe quame. Die biscop heeft van stonden an vergadert enen groten hoop gewapents volcs, ende is gecomen om sinen neve den hertoge te ontsetten. Ende dair wert enen bloedigen strijt gevochten, mer int einde verloren die Vriesen den strijt, ende daer worter omtrent VIII M verslagen, ende vele worter gevangen. Ende aldus wert hertoge Govert here van West-Vrieslant ende Oest-Vrieslant bi hulpe des biscops van Uutrecht, ende dat landt bleef hem voert subject ende in vreden IIII jaer lang.
Auteursrechtelijk beschermd