Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Robbrecht die Vriese mit zijn wijf ende kinderen uut Hollant verdreven worde van Govert mitten Buyl.
Dat VII capittel.

Als nu biscop Willem desen brief mit loesheit ende mit quader narratie ende anbrengen van den keiser hadde impetreert ende verworven, ontboet hi sinen neve Govert mitter Buyl, hertoghe van Loreinen, Brabant ende Ardenne, ende vergaerden te samen een groot swaer volc van wapenen. Ende zijn gecomen in Hollant, doe men screef M ende LXXI, omtrent die stede van Leiden. Robbrecht, voecht van Hollant dit vernemende, dede vergaderen alle tvolck van wapene dat hi crigen mochte, ende ghing desen II princen tegemoet, ende daer wert seer gevochten an beiden siden. Mer int eynde cregent die Hollanders te quaet, ende daer werter mit allen veel verslagen; ende Robbrecht ontquam, ende nam sijn wijf mit haer kinderen, ende toech in Vlaenderen te Ghent, ende bleef daer een wijl tijts. Dese victorie geschiet wesende, dede biscop Willem desen hertoge Govert mitten Buyl hulden in allen steden van Hollant, ende regeerde dat lant mit cracht V jaer lang, ende ontfing die graefscap van Hollant te leen van desen biscop Willem, ende brocht alle dat lant onder sine subjectie ende heerscappie. Alle die hem teghen waren, verjaechde hi of versloech se. Die bisscop dede alle die frontieren ende palen¹³⁴ van den lande vast besetten ende naerstelijck bewaren teghens den jonghen joncheer Dirck van

134 frontrieren ende paeln AB.

[p. 126r]

Hollant. Ende dede maken een groot, starc casteel tot Yselmonde, daerop settende enen cappetein met vele vrome luyden van wapenen om dat te bewaren. Dese hertoge Govert mitten Buyl stichte ende fondeerde tusscen dye dorpen Rijswijck ende Ouderschye tot sijnre ewiger memorien een stede dye hi noemde Delft, ende niet veer buten der stadt een casteel, daer hi zijn woenstat in nam, terwilen dat hi in Hollant domineerde ende heerscappie hadde.