Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van III striden die grave Florijs van Hollant hadde tegen sine vianden, dair hi van den tween victorie hadde, ende in den III bleef hi verslagen.
Dat IIII capittel.

In den jare Ons Heren M ende LVIII, verbonden hem te samen die aertsebiscop van Coellen, dye biscop van Ludic, die marcgrave van Brandenburch, Lambrecht grave van Loeven, Wichaert, voecht van Ghelre, ende Harman, grave van Kuyck. Dese versaemden een groot machtich heer van volc, ende quamen neder in Hollant om grave Florijs dairuut te slaen ende heel Hollant te destrueren. Grave Florijs dit vernemende, heeft terstont vergadert alle sine edelen, ridderen ende sciltknechten, ende is getogen binnen Dordrecht mit een groot swaer heer van volc om sine vianden aldair te verwachten, die dus crachtelicken op hem quamen mit een ontallic heer van volc, horen anslach doende in Zuyt-Hollant. Ende doir raet ende ingeven eens ouden edelen ondersochten ridderman in der wapenen, dede grave Florijs vele graven ende putten heimelicken opscieten ende delven, ende liet die weder decken mit hoey, stro ende¹²⁸ zoeden ende gras, daer sine vianden hene comen souden, opdat men se niet sien noch bekennen en soude, om also sine vianden te crencken ende mit subtijlheit ter neder te trecken. Ende hi hadde bi hem ontboden die Oest-Vriesen, dat si mit allen horen macht hem te hulpen souden comen. Die Vriesen onderdanich wesende des graven gebot, scicten uut ende senden den grave alle die cloecste ende uutgelesenste vrome mannen van wapenen die si hadden, ende zijn snellicken horen heren ende grave te dienst ghecomen

128 stroen AB.

[p. 124r]

¹²⁹ in die stede van Dordrecht, ende bleven daer leggen, verwachtende den coemst hore vianden. Ende als dit grote machtige heer ende volc van wapenen ende¹³⁰ die grote heren ende vorsten in Zuit-Hollant quamen om die stede van Dordrecht te winnen, ende den grave doot te slaen, ende om voert dat lant te verwoesten, niet wetende van die graven ende putten die dair heimelicken verborgen lagen, zijn si mit groten hopen in die graven ende putten gereden ende gelopen, also overtallic die ene opten anderen vallende, dat si dair versmoerden ende verdroncken mit grote hopen. Ende daer is ene jammerlicke moert ende nederlage geschiet over dat overlantsse heer, want daer vele dusenden versmoert ende verdroncken bleven. Grave Florijs binnen der stede leggende, ende siende dat sine vianden in aldusdaniger last ende node waren, ende dat si hemselven niet behelpen noch verweren en mochten, heeft hi die poorten van der stede op gedaen, ende is mit groter macht van volc sine vianden te moet gegaen, mit groten gecry ende gelude van hoornen ende basunen, ende dair began enen bloedigen ende bitteren strijt; want daer bleven doot ende verslagen omtrent XL M man, ende daer smoerden ende verdrencten omtrent XXVI M, ende die ander die ontghingen, namen die vlucht, wikende, ende lopende wech uuten velde. Ende daer bleven doot die biscop van Ludic ende die grave van Henegouwen; ende grave Lambrecht van Loeven ende Wichaert, voecht van Gelre, worden gevangen, mit vele andere heren, ridderen ende knechten, die elc voir hoir vangenisse mosten geven tot rantsoen II M marck silvers. Dese victorie¹³¹ hadde grave Florijs tegen sine vianden op Sinte Odulfs dach, des smargens in der dageraet.

Dairna, in den jare Ons Heren M ende LXII, die biscop van Coellen, die marcgrave van Brandenburch ende grave Harman van Kuyck hebben wederom vergadert een groot swaer heer ende volc van wapenen, daer die marcgrave selver een hooftman ende beleitsman of was, ende sijn gecomen in Hollant, stichtende roof ende brant, om also te wreken dat verlies dat si in voerleden jaren geleden hadden. Grave Florijs dit vernemende, heeft terstont vergadert alle zijn volc van wapene ende als een onversaecht ende vroem prince is hi dese machtige heren ende vorsten, sijn vianden, stoutelic te gemoet gegaen, stellende sijn volc in goeder ordinancien; ende daer ist tot enen swaren stride gecomen. Elc toende hem dair die vroemste te wesen, mer die Hollanders hebben int einde dat overlantsse heer doirbroken, ende hair bataelgen gescoert, vangende ende slaende soe gruwelicken, dat si int eynde die vluchte namen; ende hadden die victorie, nemende vele gevangen, ende keerden mit groter triumphen ende zege wederom. Dese strijt gesciede op Sinte Martijns dach te midsomer. Ende als grave Florijs sine vianden dus hadde verjaecht ende verslagen, ende seer vermoeyt was in den stride ende hemselven seer betrouwende in die cracht ende mogentheit zijns heers, heeft hi hem ter neder gestelt te leggen rusten des middages onder enen Willigenboem, mit alle zijn heer, in een dorp geheten Hemert, leggende tusschen die Wael ende die Mase, neffens Hoesden over. Ende siet, die grave Harman van Kuyc, die voirvluchtich was geweest in den strijt, is onversienlic comen vallen op grave Florijs ende zijn vermoeyde ende slapende heer, ende heeft mit alle seer op hem geslagen, want si tot geenre ordinancie noch verwere comen mochten. Ende die edele grave Florijs wert daer geslagen mit omtrent XXVI C man, na dien dat hi dat graefscap van Hollant ende Zeelant mit groter vromicheit hadde geregeert na zijn broeders doot XIIII jaer, ende die graefscap van Oest-Vrieslant XXII jaer. Ende zijn dode lichaem wert gebrocht tot Egmont, ende aldaer met betamelicker ende wenender uutvaert begraven bi sinen broeder, grave Dirck. Ende als dese strijt was gheschiet, weinich tijts daerna, quamen dye van Dordrecht die den afterhoede hadden, mit alle hoer macht, ende bevochten weder den grave van Kuyck, ende daer viel weder eene grote strijt. Mer dye Hollanders creghen die overhant, ende die grave werdt daer met alle sijn volck verslaghen. Dese edele grave Florijs met sijn wijf begaefden dat cloester van Egmont tot een eewighe memorie mit een stucke¹³² landts in esciuum Delft, betalende

129 C XIIII AB.

130 ontbr. AB.

131 vittorie AB.

132 stuckke AB.

[p. 124v]

jaerlixs V pont ende een unce; in Boschusen een manse, betalende alle jaers II uncen; bi Delft II mansen, ende neffens Delft over IX mansen.