Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat biscop Bernulf van Uutrecht fondeerde ende stichte binnen Uutrecht II collegij kercken, ende voirt van sijnre doot.
Dat III capittel.

Omtrent dese tijt dat grave Florijs regeerde, heeft die eerwairdige biscop Bernulphus tot zijnre ewiger memorien gefondeert ende gesticht binnen sijnre stat van Uutrecht II heerlicke collegiate kercken, die ene in der eren des heiligen ende prince der apostelen Sinte Pieters, ende die ander in der eren des heiligen voirlopers Christi Sinte Johans Baptisten. Ende hi nam die helft van den canonicken uut Sinte Salvatoers monster ende kercke: dat waren XX canonicken, ende sette die tot Deventer, ende stichte dairmede een collegiate kercke in die ere des heiligen confessoers Sinte Lebuijn. Ende hi nam die abdie ende tconvent dat die biscop Ansfrijt gesticht hadde opten Heiligen Berch buten Amersfoert; die sette hi binnen der stat van Uutrecht, ende fondeerde een scoen abdie in die ere Sinte Pouwels des heiligen apostels. Hi hadde oec mede verworven van den keiser van Romen die stat van Groeningen mit alle sine toebehoren. Ende na vele goede wercken ende doechden, is dese eerwaerdighe bisscop Bernulphus in vreden gestorven int jaer Ons Heren M ende LIIII als hi dat bisdom mit groter eren ende in rusten ende vreden hadde berecht XXVII jaer. Ende hi werdt tot Uutrecht ghebrocht ende in Sinte Pieters kerck begraven. Ende dairna, als men zijn lichaem soude transfereren ende oversetten van der stede daer hi eerst begraven was totter stede dair hi nu leit, dat is opt choer, wert hi gans ende heel gevonden ende welrukende, alsof men in eenre apteken geweest hadde. Ende sine ornamenten, dair hi in begraven was, worden scoen ende wit gevonden, alsof hi eerst hadde begraven geweest, sonder vlecke ende smette. Ende mit dese selfde ornamenten doet men noch huden opten dach misse, als men zijn memorie ende jaergetide hout, ende niet anders. Zijn graf wert dagelixs ghevisiteert ende versocht van den vroukens, die crancke ende siecke kinderkens hebben, die groyen noch wassen en willen in haer joncheit, ende vercrigen aldair, mits zijnre verdiensten, gesontheit, als men dagelixs bevint ende ondersocht wert.