Hoe dat Geertruyt, die graefinne des jongen Dircs moeder, ende dairna Robbrecht die Vriese, Hollant berechten van des jongen grave Dircs wegen.
Dat V capittel.
Nae grave Florijs' doot voerseyt regeerde in Hollant sijn wedue, Geertruyt, des hertogen Heimans dochter van Sassen, van Dirc haer outste soens wegen, die noch jonck was, II jaer lanc seer rustelic ende vredelic. Na welke tijt, te weten int jaer M ende LXIII, nam te man bi consent der edelen van Hollant ende Vrieslant, Robbrecht die Vriese grave Baldewijns van Risels sone, die een vermaert, vroem ridder was, die doer zijn cloecheit ende verstande dede sinen vader voernoemt, grave van Vlaenderen, tegens keiser Henric die IIII triumpheren in enen groten stride; welcke Robbrecht is, bi den steden van Hollant, Zeelant ende Vrieslant, voecht ende momber gemaect van den jongen joncker Dirc van Hollants wegen, graef Florijs ende dese Geertruyts sone. Ende bi desen Robbrecht die Vriese, horen lesten man, hadde si II sonen, als Phillips, dye jonck starf, ende Robbrecht, die jonge Vries genoemt, die mit Goedevaert van Bullioen dat Heilige Lant inwan, ende na den vader grave van Vlaenderen geworden is; ende III dochteren, als Alijt, coninc Kanuyts wijf van Demarken ende Noerwegen, dair si bi wan Kaerl, na graef van Vlaenderen; die II dochter hiete Geertruyt, graefinne van Alsacien; die III was genoemt Maria, een devote nonne ende oec na menich jaer abdisse van Messenen in Vlaenderen. Dese grave Robbrecht die Vriese en hiete also niet dat hi een geboren Vries was, oft een prince der Vriesen, mer omdat hi so cloeck, stout ende vroem was, als oft een Vriese hadde geweest van herte, van moede ende van lichaem. Hi was een vermaert, onversaecht ende vroem man ter wapen, dat men al kerstenrijc doer van sine vromicheit wiste te seggen. Waerom dat hi doer instancye ende bede der heren ende edelen van Hollant, Zeelant ende Vrieslant tot enen momber ende voecht wert gecoren van des jongen joncheer Dircs wegen, nemende die wedue van grave Floris ende desen joncheer Dircs moeder tot enen wive. Ende hi regeerde die landen in groten rusten ende vreden VII jaer lanck. Ende binnen desen tiden dat hi noch voecht was, is hi mit vele princen ende vorsten gereyst int eylant van Rodes ende van Cypren, bedrivende ende doende daer vele vrome feyten van wapenen op die heyden ende ongelovige Saracenen. Vandaen, doer begeerte der princen ende vorsten, is hi gereyst mitten hertoge van Farraer, mitten hertoge van Bruynswijck, mitten grave van Gulic, mitten grave van Loon ende mit meer andere vrome heren ende veel volcs van wapenen in dat Heilige Lant, dair hi wonderlicke ende grote feyten van wapenen tegens die heyden dede; ende elck ontsach sine vromicheit ende cloecheit. Ende als alle dese vrome heren vele striden ende
Auteursrechtelijk beschermd