Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier begint die VIII divisie, ende heeft VI capittelen.

Paeusen.
Anno M XLVI.
Dat I capittel.

Silvester die III was die C LVII paeus, een Romein, ende sat mer II maenden; want Benedictus die IX die verdreven was, quam weder in sijn macht myt hulpe sijnre pertie. Mer Benedictus en sat daer niet langhe in, want hi resigneerde of vercofte dat paeusdom¹¹⁷ enen geheten¹¹⁸ Johan, archidiaken, die namaels Gregorius die VI genoemt worde, God betert. Het was so veer ghecomen onder die Romeinen, so wiet meeste ghelt ende goet geven woude, dye vercreech meest. Ende also dese Silvester daerin quam¹¹⁹, also worde hij weder daeruut verdreven.

Gregorius dye VI was dye C LVIII paeus, ende sat II jaer. Dese paeus vercreech van keiser Hendrick den III dat hy alle denghenen dye den pelgroms beroefden, of den priesterlycken staet enighe ghewelt ende injurie andeden, dat hi over die in des keisers name recht ende justicie doen soude, dwelck hi scerpelick dede, ende lieter vele van den lyve rechten, waerom dat hem dye cardinalen seyden te wesen een dootslagher ende bloetghyerich mensch, ende dat hi nyet waerdich en waer begraven te legghen onder den paeusen, mer onder den bueren ende leken. Die paeus dit vernemende, begheerde op dye cardinalen, als hi doot waer, dat si hem setten souden voer dye doere van der kercken, ende sluten die al vast van binnen toe, ende verwachten Goods oerdel; ist dattet God belyeft ende ic wel gedaen hebbe, dat mijn lychaem inganc heeft: verblijt u; ist anders, doet daermede dat u belieft. Sy deden also, ende siet: daer quam een grote onversienlicken wint, ende sloech die doeren mit groter cracht ende gewelt op. Doer welcke mirakel die cardinalen des paeus lichaem in Sinte Peterskercke mit groter eren gedragen ende begraven hebben, ende hilden hem als een heilich, dye si te voren als een dootslager plegen te verachten.

Clemens die II was die C LIX paeus. Hi was biscop van Bamberch, ende sat IX maenden. Hi croonden keyser Henrick die III. Hy verbant ende dwanck den Romeinen daertoe, dat si sweren

117 paeudom AB.

118 gheten AB.

119 quaz AB.

[p. 120r]

mosten, dat si voertan buten des keisers consent genen paeus kiesen en souden, waeruut de Romeinen toernich worden, ende deden hem vergeven.

Damasus die II was die C LX. paeus; hi was uut Beieren: een Duytsch, ende sat mer een maent. Hi nam dat paeusdom mit gewelt, mer God haelden snelliken uuter tijt; aldus can hi den hoechhertigen menschen wederstaen, den anderen tot een exempel.