Hoe dat grave Dirck van Hollant oflivich worde.
Dat XIX capittel.
Dye edele ende vrome grave Dirck van Hollant, als hi wedergecomen was van sijn pelgrimage des Heyligen Graf ons Heren, heeft hi een wijl tijts sijn dagen geleyt in rusten ende vrolickheit. Ende sijn tijt vervolt wesende, is hi vol goeder wercken van deser werlt gevaren int jaer Ons Heren M ende XXXIX, als hy dye graefscap van Hollant ende Zeelant eerlick hadde berecht XLVI jaer. Hi hadde alle die daghen zijns levens vele oerloghen ende striden tegen den Vriesen, dien hi mogentlic heeft verwonnen ende tot zijnre onderdanicheit ghebrocht. Diergeliken tegen dat Sticht ende bisscop van Uutrecht, dien hi mede bedwanc te bliven binnen horen palen van den lande. Ende hi wert mit groter eren ende triumphen tot Egmont gevoert ende bi sine ouderen begraven. Sijn huisvrouwe Wijtilhilt, is na haers mans doot wedergekeert in Sassen ende starfGa naar voetnoot116 daerna int jaer M. ende XLIII, ende wert daer eerliken begraven. Dese edele voerst gaf den abdie van Egmont tot een testament ende memorie voer zijn ende zijnre ouders zielen: Item IIII mansen in Romenburch die alle jaers gelden X pont. In Romenburch brueck, tlant betalende jaerlics XVI uncen. In Swieten, tlant betalende tsjaers XIII uncen . In Waltmannen Veen tlant betalende tsjaers XVI uncen. Noch hierenboven gaf hi tconvent voernoemt twe costelike pallien ende cleden, die men op grote feestdagen plach te hangen in der kercken van der abdie.
Auteursrechtelijk beschermd