Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt die graef Dirck hadde tegen die Vriesen.
Dat XIII capittel.

Nae desen twe triumphen ende victorien die grave Dirck tegens den burgers ende horen biscop vercregen hadde, als voerseyt is, nam hi voer hem sijns vaders doot te wreken ende den Oest-Vriesen te bevechten. Tot welker heervaert die keyser Henric dye Eerste sende desen grave Dirck te hulpe den hertoge van Loreinen of Lottringen, gheheten Govaert mitten baerde, ende vele cloeke reysenaers¹⁰⁸ ende vrome vechters. Voert so nam graef Dirck voerseit voer hem een groot heer van volck uut Hollant, hebbende oec mede by hem den biscop Adelbolt van Uutrecht, die noch sijn gevangen was. Ende als dit grote volck der Hollanderen ende der Vriesen bieen gecomen was om enen bloedigen strijt te slaen, is in der lucht gehoert een vervaerlike grijslike stemme, roepende: 'Vliet! Vliet! Vliet!' Ende terstont namen die Hollanders den vlucht uut vervaernisse deser stemmen, ende liepen sonder ordinancie elck sijns weges, sonder ommesien. Ende de biscop ontquam uuten handen der Hollanderen, ende ghing over mitten Vrisen, dien hi tot alre rebellicheit informeerde ende starcte tegen desen graef Dirck. Ende hertoge Godevaert van Loreinen wert daer gevangen van den Vriesen. Desen nederlage heeft God den Hollanders laten gescien, omdat die grave in hemselven soude leren, dattet een Heer ende God is Die den menschen vernedert ende verhoecht. Die grave is gecomen binnen Haerlem, ende heft weder versch volc vergadert, om weder enen strijt te vechten tegen die Vriesen. Ende als hy omtrent Heijligeloe gecomen was, quam hem stoutelic mitten Vriesen tegemoet bisscop Adelbolt, ende hadde mit hem den hertoge Govaert van Loreinen, die daertoe gedwongen was om te vechten tegen den Hollanders. Daer gesciede enen groten swaren strijt, ende dye grave heeft int einde de overhant gehouden, ende hadde victorie, daer veel Vryesen gebleven sijn. Ende dye biscop ontquam myt grote perikel sijns lijfs, ende die hertoge quam weder over uuten Vriesen handen sonder vrese oft enich rantsoen. Dit gesciet wesende, vergaerde dye grave mitten hertoghe van Loreynen alle dat volck van wapenen dat hi crighen konde, ende quam mit al dit volck in Vrieslant, brandende ende rovende alle haer dorpen ende husen, ende versloech een ontallick volck, ende nam mit hem een alten groten roef van ghevanghen beesten ende alreleiden goeden, ende spolieerde ende beroefde dat lant uuter maten seer. Ende hi brocht dat lant weder onder sine subjectie ende gheboden, ende quam weder in Hollant mit groten zeghe ende victorie, ende gaf dat lant van Vrieslant sinen jonghen soen Florijs; ende hy ontfinct weder van sinen vader te leen. Ende hi toech in Vrieslandt, ende si deden hem hulde ende manscap, ende regeerde se mogentlyck alle dyen daghen sijns levens. Hyernae is graef Dirck ghetoghen mit here Jan van Arkel, sinen trouwen here ende vasalle, myt mere andere van sine heren, tot Jherusalem int Heylyghe Lant, om sine pelgrymaege te doen, ende dat Heylighe Graf ons Heren te visiteren. Dwelcke hy myt groter devocien volbrocht heeft. Ende daer wesende, is dye vrome ende edele here Jan van Arkel daer ghestorven; ende grave Dirck deden eerlicken begraven.

108 reysesenaers AB.