Een copie van een privilegie gegeven der kercken van Uutrecht bi biscop Baldrijc.
Dat XIIII capittel.
Baldrijck biscop van Uutrecht heeft verleent ende gegeven der kercken van Uutrecht een privilegye in deser formen, als hierna volcht:
Baldricus, overmits die Godlicke goedertierenheit ende goetheit, oetmoedich biscop des heyligen kercks van Uutrecht. Onsprekelijcke ende onverganclicke bliscap ende vrolicheit des ewigen levens, mit God den Here, alle gelovigen in Christo, die nu sijn of namaels wesen sullen. Kenlic si allen kersten gelovigen menschen die nu sijn oft na comen sullen, hoe dat ic, Baldrijc, onwairdich biscop des Heiligen Kercke van Uutrecht, als ic na den doot des eerwaerdigen vaders ende here Rathbouts, biscop van Uutrecht, geroepen ende ghecoren was tot enen biscop van Uutrecht ende van minen metropolitaen, dat is den aertsbiscop des Heyligen Kercke van Coellen, geconfirmeert ende geconsacreert was, so hebbe ick voer mij genomen te visiteren die plaetse des Heyligen Kercke van Uutrecht, daer ick den name of voere ende drage. Tot welcker plaetsen comende, hebbe ic, ach lacen! die gevonden van den Denen gedestrueert ende alheel desoleert ende verlaten. Ende daertoe die kercken des gloriosen ende eerwaerdigen Sinte Martijns, mijn patroen, ende Sinte Salvatoers verwoest ende verbrant, en hebbe ic mi niet konnen onthouden van tranen; swaerlijcken beroert met droefheyt mijns herten van binnen, hebbe ic mit uutstortinge der tranen die Godlicke moghentheit tot mijnre hulpen angeroepen, opdat hi, die sine Heilige Kercke gefondeert ende ghesticht heeft, op die vaste steen, dat is Cristus, hem wilde gewarigen mit sijnre Godlicker goedertierenheit te helpen ende bi te staen totter reparacien ende wederopmakinge des Heyligen Kercks mi nu bevolen wesende. Ende hebbe mit sijnre hulpe ende assistencie die niet dat aensicht, mer dat hert des menschen beschouwende is, getimmert ende opgherecht die statmueren, mit poorten, toernen ende wijchusen die bescermt, ende mit eenre dieper graven ende veste bewaert voer der vianden anvechtinge ende bestorminge. Ende hebbe gerepareert ende weder opghetimmert, niet als ic wel soude, mer als ic redelicken mochte, die plaetse Goeds ende des heyligen vreets, dat sijn die kercken des gloriosen heyligen biscop Sinte Martijns mijn patroen, ende Sinte Salvatoers, van den Denen ende ongelovigen verwoest ende vernyelt. Die canonicken van deser kercken verjaecht ende menichsins in allen plaetsen verstroeyt wesende, heb ic mit groter naersticheit weder tot haer kercken geropen ende in der stede der gheenre die gestorven waren hebbe ic andere gheordineert ende gheset, ende doer die verhenghenisse Goeds ende mits hulpe ende bystant der gheloviger kersten menschen bi mi comende, hebbe ic alle die vianden Cristi uut minen landen verdreven ende verjaecht, lossende ende nemende crachtelicken uuten handen mijnre vianden, die landen, thienden, goeden ende andere possessien toebehorende der Heyliger Kercken van Uutrecht. Daerenboven tot meere onderhouwinge, hebbe ic gegeven uut gonstiger herten ende milde handen den canonicken der voerseyder kercken ende opdat si vuerichlicker in der diensten ende loven Goeds moeten werden inciteert, alle die anwassinghen ende thienden der nyewer vruchten tot een usufruct ende gebruykenisse den voerseyden broeders in der selver kercken stadelicken dyenende om Goeds willen, Die alle goet weder lonende is tot vermeerderinghe Sijns diensts, dit alle in der eewicheyt te besitten ende ghebruyken. Ende dattet aldaer moet wesen tot eenre remedie ende boete mijnre sielen, ende tot vermeerderinghe in allen tijden. Ende so wie ( dwelck ick gelove
Auteursrechtelijk beschermd