Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Een copie van enen brieve dat men ghelt munten ende slaen mach in der stat van Uutrecht.
Dat XIII capittel.

In den jare Ons Heren IX C ende XXXVI, soe begaefde dye coninc Otto van Romen dye Eerste, der kercken van Uutrecht mit een privilegie ende ghifte dat men binnen der stat soude moghen munten ende ghelt slaen in deser formen:

In den Name ons Heren Jhesu Christi, die Godlicke mogentheit alle ding disponerende: wi, Otto, coninc, doe kenlic allen kersten menschen hoe dat wi doer begeerte ende instancie onser gheminden huysvrouwe geoerloft hebben een munte te geschien ende geslagen te worden in der stat van Uutrecht, daer nu ter tijt resideert ende sit die eerwaerdighe heer ende biscop Baldrijck. Ende overmits onser coninclicke majesteit ende auctoriteyt, verbieden wi dat ghene grave noch rechter enige tolle, ghifte oft gaven oft enige queste, baet ende profite en exigere noch en neme van deser munten. Mer so wat daer of te nemen is oft mochte worden genomen, dat geven ende verlenen wi heel ende al den biscop des selven stats ende kercke volcomelicken dat te besitten tot eenre aelmissen ende quijtsceldinge der sonden mijns ende ons lief vaders, des doerluchtigen conincs Henrijcs, saliger memorien. Ende opdat dese onse ghifte

[p. 107v]

van allen kersten menschen nu ende hier namaels vast ende van stade ghehouden mach worden, hebben wi desen brief doen scriven, ende mit onsen gulden vingerling doen besegelen, ende hebben die mit onser hant onderteykent. Heer Otten teyken des doerluchtigen conincs; Adulgagus, notarius, in die stede des oversten cappellaen Robbrecht, hebt bekent. Ons rijcks dat vijfte jaer, ghegeven etcetera.