Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 107r]

Van Baldrijck, dye XV bisscop van Uutrecht.
Dat XII capittel.

Baldrycus was des graven Lutgeers die X grave van Cleve sijn soen, ende des graven Baldewijns broeder. Ende als men vint in der Lomberden historien. Henrijc die in desen tiden Roemsce coninck was, dye werdt te rade van grooter devocien, dat hi na Ratbots des heyligen biscops doot sinen zoen, geheten Bruyn, woude verchieren mit clergien, ende setten hem tot enen bisscop der kercken van Uutrecht. Mer als die coninc vernam dat die wrede Denen die stadt van Uutrecht verdestrueert hadden, ende meest alt volc van den bisdom verslagen hadden ende verjaecht, daerom setten die coninc desen Bruyn, sinen zoen, totter ridderscap, ende die Denen te wederstaen ende dat hi dat selve bisdom mochte bescermen ende wederhelpen repareren ende opbrengen. Ende hierom: na des heyligen Rathbodus', biscop van Uutrecht, prophecie, so is gecoren dese Baldrijc tot die XV biscop van Uutrecht. Ende als hi gewijt ende gheconsacreert was tot enen biscop, heeft hij mit alle sine macht ende trouwe hulpers dye Denen uut sine stat ende bisdom verjaecht. Ende heeft oec mit alre naersticheit die stat van Uutrecht gerepareert ende weder opgetimmert mit diepe graven ende mueren, mit toernen ende starcke wijchusen ende bolwercken. Noch heeft hij dye grote kerck ende dye sale mit andere edificien ende husinge gerepareert ende weder opghemaect mit groter eren ende costen. Daerna in den jare Ons Heren IX C ende LXVI is hi boven in Ytalien gereyst by den coninc Otte die Eerste om sonderlinge saken der kercken van Uutrecht angaende. Ende wederom comende, brocht hi mit hem die lichamen der heylighen⁸², als des heylighen biscops ende martelaers Sinte Benignus, des heyligen ridders ende martelaers Sinte Ponciaen, ende der heyligher joncfrouwen Sinte Agniet, ende sette die betamelicken in dye domkercke des stats van Uutrecht. Hiertoe so vant hij noch bi Godlicken openbaringe die lichamen der heyliger confessoren, als Sinte Lebuijn, Werfoerts, Plechelm, Wiroys, Oetghier, Odulph ende Rathbouts, mit welcke heylige reliquien ende gebeenten hi sine kercke van Uutrecht hoechlicken heeft verchyert ende verheven.

82 heylihen AB.