Een copie van enen brieve van der ghifte der kercken van Tyele.
Dat XV capitel.
Otto, deerste van dier namen, keyser van Romen, heeft der kercken van Uutrecht gegeven die kercke van Tyel, mit andere kercken ende sinen toebehoren, mit enen brieve sprekende aldus.
In den Name des heyligen ende onverscheyden Drievoudicheits. Amen. Otto by der genaden ende goedertierenheyt Goeds coninc. Kenlic si allen onsen getrouwen, die nu sijn ende namaels wesen sullen, als dat wi, om die liefte Goeds ende tot remedie ende boete onser sielen, gegeven hebben ewelicken tot enen vryen eygen, tot behoef der biscoplicker kercken van Uutrecht, ghesticht in der eren des heiligen confessoers Sinte Martijn. Welcken stoel nu besit die eerwaerdighe vader ende here Baldrijck. In den eersten een cloester, ghemaect in een plaetse gheheten Tyel, mit eenre nyewer stenen kercke in derselver stede ende plaetse, mit allen anderen kercken, mit familie, dienstboden, knechten, bosschen, wateren, visscherien, weyden; mit allen anderen proprieteyten ende eyghendomme van rechtsweghen daertoe behorende; hem ghegont ende ghegheven van den grave Walghere, Radthboden ende Ardoen, ende van horen voerouderen. Noch daerenboven een Willegenhout bosch, staende ende gheleghen by derselver stede. Ende wi hebben hierof doen scriven dese lettere, ende willen die vastelicken onderhouden hebben. Ende opdat nyement onser successoren ende nacomers, coningen, yet van deser collatien uut onser miltheit der kercken van Uutrecht ghegheven, gheen macht hebben sal die te breken of weder na hem te nemen, hebben wi desen brieve mit onser eyghen handt onderteykent, ende mit onsen zeghel ghestarct. Dat teyken des doerluchtighen conincs Otten. Bruno, die cancellier in die stede van Wigfijdt, overste cappellaen, heb ic dit onderteykent. Ghegheven opten XII kalende van mey, int jaer Ons Heren neghen C ende L, die VII indictie, in sijn XV jaer sijns keyserrijcs, salichlicken in den Name des Heren. Amen.
Auteursrechtelijk beschermd