Van Sinte Rathbout die XIIII biscop van Uutrecht.
Dat VIII capitel.
Rathbout, gheboren uut Vrieslant van des conincx Rathbouts gheslacht, ende als die bisschop Egilbolt gestorven was, soe wert doir beveel ende mit dwange des keysers Arnulphi dese Rathbout geconsacreert ende ghewijt dye XIIII bisscop van Uutrecht, een man van hoger leringhe, heylich, goedertieren ende wel gheboren, van edelen gheslachte; want sijn naem in den Latijn beduyt in Duytsche also vele als een bode des concilijs ofte raet; ende hi was sekerlic een man ende een engel des groten raets, want hi opgevoet was in den palase ende hof des coninc Kaerls van Vrancrijck, ende doer den philozoef Anno in den VII vrien konsten seer geleert. Hi heeft scone dingen gescreven van Sinte Willeboert ende van Sinte Bonifaes. Hi maecte oec mede dat gansse officium van dye verheffinghe Sinte Martijns, dat men noch huden des daghes houdt ende singt int crisdom van Uutrecht.
Auteursrechtelijk beschermd