Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die donatien ende ghiften die grave Dirc gaf dat cloester ende broeders tot Egmont.
Dat VII capittel.

Dese grave, uut rechter devocien, ende om te vercrighen ende deelachtich te wesen dat loen des ewighen levens, heeft die kerck ende tcloester van Egmondt ghedoteert, beghavet ende versien met milde aelmissen, goeden, possessien van renten ende landen. In den eersten heeft hij geoffert ende ghegheven den heylighen confessoer Sinte Aelbrecht ende der kercken van Egmont voerseyt, een boeck gheheten Historia Tripertita; ende een boeck, dair ingescreven stont die text des heylighen Evangelij, buten omme gecleet ende bedect met root blinckende gout ende vele costelijcke ghesteenten. Ende dye edele ende devote graefinne, sijn huysvrouwe Hildegaert, offerde ende gaf den voerseyden heyligen confessoer ende der kercken van Egmont enen schonen gulden tafel ende outaer, mit menigherley costelicke ghesteente verchiert ende blinckende. Ende int opperste van deser tafele des outaers stont ene costelijcke blinckende steen, dye alle dat choer des nachtes verlichte, gelijcken of daer een barnende kaerse in ghestaen hadde. Ende dese steen wert heimelicken ende dieflicken uut deser casse ghestolen, want, als men seyt, soe hadde dese steen sulcken virtuyt ende cracht over hem, dat so wie die an hem droech, die ghing onsienlick, bi dage ende nachte. Hierenboven so begaefde die grave ende zijn huysvrouwe dat voerseyde cloester mit vele possessien van landen ende goeden, als in Scaghen, ses mansen. In Harragen XI mansen ende een vierendeel. In Remigom VIII mansen, bi dat cloester II mansen, tusschen dat dorp Elebentere Hemerck dwelc men heet Siterhem IIII mansen ende een half. In Wijmnen een manse ende een half ende van dyer Maesen voert tot Aren toe, alle dat lant ghebout ende ongebout, weyen ende velden, waeruut

[p. 106r]

dat te verstaen is, dat alle dat landt datter leit tusschen Aremerswet ende Wijnnerswet toebehoerde dat cloester. Aremerswet is gelegen an die zuytside des cloesters beneden Bachem, ende Wijnnerswet is gelegen an die noortside des cloesters bij Wijnnen, als men dat mercken mach. Daerenboven hebben si noch gegeven dat convent voerseyt in Wallehem III mansen; in Osden II mansen ende een halve; in Lijmben VII mansen ende een halve; in Sunthem II mansen; in Haren XIII⁸¹ mansen ende een halve, ende noch aldaer IX mansen. In Bachem III mansen; in Ordenbol II mansen; in Those een manse; in Obingen een manse; in Heemstede een manse, bi twater oft rivier Bamester een manse; tusschen dat beecken Sculingleke ende Hureslede IIII mansen, mitter visscherien. In Velsen VI mansen; ende dofferhande van den outaer op Sinte Aechten dach van der eender noenen totter anderen; in Voerhout die kerck mit die thienden, ende Noertgau mitter thienden; in Alcmere alle die tollen.

81 xtij AB.