Van II schone miraculen die Sinte Aelbrecht bewees an desen grave Dircks twee kinderen.
Dat VI capittel.
Dese grave Dirc, als voerseyt is, hadde enen soen, gheheten Egbert; dye welcken hem mit gansser herten gegeven heeft tot een gheestelijck leven om God te dienen, ende was gheworden subdiaken, dat is, dat hi die epistel in der missen singen oft lesen mochte. So worde dese jonge, wesende in sinen bloyende joecht, des dages na Palmdach, bevangen mit een groter, starcker, barnender coertse ofte zaghe, durende tot die hoechtijt des gloriosen confessoers Sinte Aelbrechts, denwelcken men hout op den VII kalende van julio, dat is des dages na Sinte Johans Baptisten dach geboerte tot midsomer. Ende als hij mit groter betrouwen, doer die verdiensten des heiligen confessoers gaerne mede geweest hadde ende hem daertoe bestelt hadde om te wesen in den dienst van deser groter hoechtijt ende feeste, so is hi also volcomeliken van alle siecten ende qualen ontbonden ende verlost gheworden, als oft hi nye mitter siecten beroert en hadde gheweest, ende is mit groter blischappen vervolt, ende bereyde hem mit groter devocien te gaen totter hoechtijt ende feeste te voldoen sijn diensticheit, dye hi langhe begheert hadde. Van desen lieven, devoten ende edelen jonge Egbert, hoe dat hij hem gehadt heeft in sijn bisscoplicke officie ende oerdene, sal na geseyt worden. Ende als voer geseyt is, so hadde dese graef Dirck een uutnemende schoen dochter, gheheten Alijt oft Erlindt. Dese scone maghet ende joncfrouwe was lange tijt ghequelt van grote siecten, dat si mits dient gesichte van haer een oghe verloren hadde. Mer doer die grote verdiensten des heylighen confessoers Sinte Aelbrecht heeft si haer gesichte weder geheel ende gansselic vercregen, daer si ende haer ouders seer of verblijt waren, God ende den Heyligen Confessoer lovende ende danckende van die grote benificien ende weldaden.
Auteursrechtelijk beschermd