Hoe grave Dirck dat cloester van Egmont dede van steen maken, ende nam die nonnen daeruut.
Dat V capittel.
Als nu grave Dirc dese Vriesen aldus hadde verwonnen ende onder sine subjectie ghebrocht, heeft hi dat verwoeste cloester van Egmont, dat sijn vader van hout hadde doen maken, ofghebroken, ende heeft dat van nyewes weder angeleyt ende doen repareren ende maken, tot sine grote costen, van steen. Ende hi versette dye nonnen, ende dede daer incomen monicken van Sinte Benedictus oerde; op, alst van node waer ende die Vriesen weder rebelleerden, dat si hem te bet souden wederstaen ende voer den Vriesen beschermen. Ende die grave nam dese nonnen voerseit, ende sette die niet verde van der stede van Haerlem, bi dat dorp geheten Heemstede, op een plaetse genoemt Bennenbroeck, ende verboet hen, dat si geen nonnen meer voert annemen souden oft doen cleden, opdat, als hoerre personen ontbrake ende haer leven ten eynde ware gecomen, ende si alle verstorven waren, dat alsdan die renten comen ende succederen souden an dat convent ende cloester van Egmondt. Aldus heeft dese vorstelicke prins, die een sonderlinghe liefhebber ende vuerich navolger sijns vaders ynnicheyt dese kercke voerseyt in der eren des gloriosen confessoers Sinte Aelbrechts, mit groter expensen ende costen van steen doen maken; want in dat sandighe landt en was doe ter tijt niet te crigen die overvloedicheit des steens ende calxs, waerom dattet hem te moyelicker viel ende costelicker, so groten swaren werck in sulcken sandighen ende dorren landt te fonderen ende te stichten. Ende dat costelicke pant des heiligen preciosen lichaems Sinte Aelbrechts, dat daer lach in enen stenen sarcke oft tombe, heeft hi eerwaerdelicken doen leggen in eenen costelicken wel gechierden casse; ende opdat hem ymmers niet gebreken soude an dat loen des ewigen ende toecomende salicheyts, so heeft hi daerbi geset broeders van goeden leven, ende die die observancie ende regule des strenge oerdens van Sinte Benedictus souden onderhouden, ende God daghelixs een bequaem sacrificie offeren, ende den dienst Goeds mit ynnicheyt volbrengen souden. Denwelcken broeders hij oec versach mit scone renten ende goeden tot hoerre dagelixen nootrufticheyt. Want daer eerst by ordinancie ende insettinghe sijns vaders die nonnen aldair een heilich leven hadden gheleyt, mer om der Vriesen oplopinghe endeGa naar voetnoot80 stadighe anvechtinghe, so en wast in haerre macht nyet dye observancie ende regule nae hoerre goede meninghe te onderhouden. Ende aldus so werdt daer gheset tot hoerre eerste abt een devoet ende eerbaer man van leven, gheheten Wonoboldus; ende als hij desen last an hadde ghenomen, heeft hij als een
Auteursrechtelijk beschermd