Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van II grote striden die graef Dirck hadde teghen die Vriesen daer hij victorie of hadde.
Dat IIII capittel.

Ende als die Vriesen aldus bestonden te rebelleren tegen grave Dirck ende en wouden hem niet onderdanich wesen heeft hi van stonden an vergadert uutgelesen mannen van wapenen, stout van moede, vroem van handen om te bedwingen⁷³ den hoemoet ende rebelheit der ongetemder Vriesen. Ende als die grave dus veel volcs geliken tzant bi der zee sonder getal hadde vergadert, is hi stoutelicken mit ghewapender hant getreden in der Vriesen provincie ende heerlichede, mit ludende ende blasende hoornen, myt ontwonden blinckende bannieren, ende heeft vele steden ende dorpen mit geweldiger hant ingewonnen, beroeft, verbrant ende ontallic volc mitten swaerde geslagen ende gedoot. Die Vriesen dit siende, ende omdat si geen macht en hadden des graven mogentheit te wederstaen, begeerden si des graven hulde, ende wouden tot sinen geboden staen. Die grave heeft se in genaden genomen, ende si beloofden voert an te obediren ende te staen tot der graven⁷⁴ van Hollants geboden ende diensten. Dit gedaen wesende is die grave mit grote roef, daer si alle gerijct waren, ongescent weder mitten sinen in Hollant getogen ende gekeert. Mer achlacen! ende dat scande is te seggen, als die grave weder in Hollant was ghekeert, des jaers daerna, en hebben dye Vriesen gheen gheloef gehouden, brekende ende violerende dat compact ende voerwaerden, hebben si seer wredeliken wederom rebelleert ende opgestaen tegen horen here den grave van Hollant. Want sij sijn overghetoghen myt groot swaer volck van wapenen in Hollant, bestormende⁷⁵ de stede van Alcmer; ende dye gewonnen hebbende, sloegen sij al doot dat si vonden ende verbranden dye stede totten⁷⁶ gronde toe of, met hem nemende⁷⁷ enen groten roef van ghevangen besten⁷⁸ ende ander goet. Ende togen so voert, al Kermerlant doer, verbrandende, verwoestende ende doetslaende alle dat hem resisteerde ende ter were tegens hem sette, ende quam tot Egmont

73 bedwigen AB.

74 gaven AB.

75 bestormede AB.

76 aldus C; ontbreekt AB.

77 nemede AB.

78 bestten AB.

[p. 104v]

ende verdestrueerden ende vernyelden dat cloester aldaer mit groter wreetheit ende onmenschelicheit. Ende dit gedaen sijnde, sijn⁷⁹ si voert mit alle haer macht gecomen onder wegen, brandende ende verwoesteden alle die dorpen, husen ende woensteden totten burch ende dat stedeken van Leyden (dat doe so groot niet en was als si nu is) opdat si dat mede mochten winnen ende verdestrueren, als si die stede van Alcmaer hadden gedaen. Mer die vrome burchgrave van Leyden stont hem stoutelicken ende koenliken teghen mit sine poorters ende inwoenres, dat si tot hoerre meninghe niet en mochten comen. Ende die burchgrave sende terstont boden an den grave, dat hi haesteliken soude comen, ende ontseten hem, of en mocht die stede nyet langher houden. Die grave dyt vernemende, heeft hem terstont rede gemaect, ende is gecomen omtrent Leyden, beteykenende den Vriesen enen dach ende plaetse om enen strijt myt hem te vechten. Die Vriesen dit horende, en wouden den gesetten dach van den stride niet verwachten, mer begeerden van stonden an mit den grave te vechten, niet twifellende, si en souden die victorije ende overhant hebben ende houden, overmits haer grote menichte, daer si in betrouden. Waerom grave Dirck, van noots wegen, heeft bi hem vergadert vele cloeke ende vrome wapentuers uut Hollant, ende is ghegaen uut die stede van Leyden, om te bevechten der Vriesen mogentheit. Ende hoewel der Vriesen getal ende hoep wel die helfte groter was dan der Hollanderen, nochtans hebben si den Vriesen vromeliken tegen gegaen, mit hoornen ende basunen, mit ontwonden ende blinckende banniren, om enen bloedigen strijt te vechten ende dye overhant te houden. Die grave, als een onvervaert prince, is mit alle sinen heer vromelicken tegen desen Vriesen ingetreden; ende daer gesciede ene moortlike strijt, want dye Hollanders hadden hem so vromelyken ende so stouteliken, dat sij dye Vriesen so overvillen, dat si den rugge keerden ende bestonden te vlien, ende wie best lopen mochte was die beste. Ende daer bleeffer enen groten hoop verslagen. Dese bloedige strijt gesciede bi Leyden, op de stede daer nu dat cloester tot Reijnsburch staet. Ende aldus brochte de grave dese Vriesen myt groter bloetstortinghe tot sijnre obediencie ende onderdanicheyt. Ende dwanc se daertoe, dat si hoer doren van horen husen in dat oeste maecten, ende dye soe lage, dat si in den inganck bocken ende nijgen mosten, in onderdanicheit van horen rechten heer; wanttet een ombekent volc was van wanzeden. Ende deden hem weder enen eet ende hulden, ende ontfingen hem voer horen rechten geboren lantsheer, mit groter eren ende reverencien, als dat betaemde. Ende des tsjaers daerna, dede die grave opter selver plaetsen setten ende fonderen tot Goods lof, ere ende dancberheit, een scone kercke in der eren van Sinte Laurens. Welcke kerke hyer nae-

79 sij AB.

[p. 105r]

maels Petronelle, graefinne van Hollant, grave Florijs die Vetten wijf, heeft geordineert, ende daerof ghemaect een schoen, costelick convent ende cloester, ende sette daerin nonnen van Sinte Benedictus oerde, als hierna gheseyt sal worden.