Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe Sinte Aelbrechts lichaem ghevonden⁵⁰ wert tot Egmont.
Dat XIIII. capittel.

In dit voerseyde cloester van Egmont was een devote nonne geheten Vulfit. Deser nonnen openbaerde dye heylighe confessoer Sinte Aelbrecht in haer slape, seggende ende bevelende, dat men sijn alre heylichste gebeenten, dat geliken andere lichamen ende gebeenten diepe in der aerden leggende, op soude graven ende hoge verheffen soude, ende allen menschen thonen, om den kersten menschen te exciteren ende verwrecken tot devocien, ende dat si doer sine verdiensten van God verhoert mochten worden. Ende omdat si ymmers geen twifel hebben en soude van deser openbaringe, heeft die heilige man

50 gnevonden AB.

[p. 99r]

dese nonne tot driemael openbaert. Ende om te voldoen die regule der gehoersamheit, heeft si haer gehaest dit visioen te kennen te geven den doerluchtigen prince grave Dyrck van Hollant, denwelken die plaetse daer dese costeliken scat in verborgen lach, eygen toebehoerde. Ende also die grave in allen dingen die den heiligen kersten gelove ende der Heyliger Kercken angingen altijt gevonden is geweest een getrou werckman, also is hy nu in deser saken geweest ende gevonden een snelle volbrenger. Ende als alle dingen tot sulken feeste dyenende bereyt waren, heeft hy doen opgraven den alrecostelixsten scat ende lichaem des heyligen confessoers Sinte Albrecht. Ende als dat graf opgedaen was, so is onder die tombe gevonden een scone claerre fonteyn, die tot opten dach van huden noch vloyende is, ende vele menschen mit menigerhande siecten besmet wesende, gesont ende genesen worden. Ende als die priester die sarcke ofte tombe op ghedaen hadde, so is daer een uutermaten soeten roeke uut dat graf gecomen, recht of si in den paradise hadden geweest, ende dat cleet daer sijn heilige lichaem in gewonnen lach, is noch gans ende heel ghevonden, onverteert ende onverrot, claer ende wit; ende op zijn borste wert gevonden een scoen gulden cruys, dat een groot medecijn is geweest voer menigerley siecten an lijf ende siel, ende vandaen hebben si dat heylige lichaem mit crucen ende vanen, mit groter eren ende feesten, mit loof ende sange, daeran volgende een grote scaer volcs, gebrocht tot Egmont, ende hebben dat geset mit groter eerwaerdicheit in die kerke des voerseyden cloesters, daer dagelixs vele scone ende wonderlicke miraculen gescien doer die verdiensten des gloriosen confessoers Sinte Aelbrechts.