Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van grave Dircks broeder, gheheten Walgheert.
Dat XII capittel.

Dirck, die eerste graef van Hollant, hadde eenen broeder ghenoemt Walgheert, grave van Teysterbant; ende woende by Tyel, in een⁴⁷ dorp gheheten Avezaet. Dese timmerde een kerck binnen Tyel, in der eren van Sinte Walburch

47 ine en AB.

[p. 98v]

ende sette daerin nonnen om den dienst Goeds daerin te doen. Mer na die destructie van deser kercke, sijn daerin gecomen reguliers, die daerin saten tot Adelboldts tijt die XIX biscop van Uutrecht, die oec datselfde Goedshuys, overmits outheit vervallen, repareerde ende vermaecte. Ende daerna, int jaer Ons Heren M CCC XXVIII, alsoe die burgheren van Tyel sware insolencie ende vele moeyeten andeden den proest, deken ende capittel, sijn si daeruut gesceyden op Sinte Pieter ende Pouwels dach ende ghinghen tot Aernhem. Ende doe quamen daer dye Duytsche heren van den oerden Onser Liever Vrouwen ende des hospitaels van Jherusalem, ende begonnen daer haer woninghe te nemen.