wan Clodevees II; Clodovees wan Dirck; Dirck wan Hildebert; Hildebert wan Clodovees III; Clodovees wan Chilperick II; Chilperick wan Dirck, hertoech van Aquitanien; Dirck wan Lotharijs; Lotharijs wan Dirck; Dirck wan Engelrijn Martelaer; Engelrijn wan Nanfreet; Nanfreet wan Sigisbert; Sigisbert wan bi sijn wijf Machtelt, suster van Haghenen, ende Emmen, coninghinne van Almangen oft Duytslant; desen Dirck, den eersten graef van Hollandt, ende Walgheert, den outsten graef van Teysterbant, gebroederen. Dese Dirck anvaerde twapen sijnre voervaderen, want nadertijt dat Puppijn, coninc, allene wilde voeren die volle ende warachtige wapenen van Vrancrijc, en verhengde hi niet yement voert die te voeren, dan alleen die uut sinen bloede ghecomen waren, waerom dat die coninc Puppijn voirnoemt gaf Dirck, hertoech van Aquitanien, Chilpericks zoen, coninc van Vrancrijc, een sonderlinge wapen, te weten een gulden schilt, ende daerin enen roden leeuwe, getongt ende geclauweert van lasuer oft blaeuwe. Ende want dese Dirck, die eerste graef van Hollandt, Zeelant ende Vrieslant neemt sijn oerspronc ende generatie van Dirc, hertoech van Aquitanien voerseit, als voer gescreven staet; soe betaemtet, dat hi mit recht dieselfde wapenen soude voeren ende gebruken als een recht oer ende ofcomer der warachtiger linie der eerste edele Fransse coningen, nederdalende van der Troyaner stamme. Waerom dat hi oec hoechlic an die croen van Francrijc gehulict is geweest, te weten dat hi tot enen wive genomen heeft Genam of Gonnam, Puppijns die minre dochter, coninc van Ytalien, des groten coninc Kaerls joncste zoen; also dat Lodewijck, deses Kaerls die Caluwen vader, dye hier Hollant uutgeeft, oem is geweest van dese Gena of Gonna, graef Dircks wijf ende Kaerls die Caluwen naeste nicht, dat is sijnre vader broeder, ende daerom sijn eyghen oems dochter. Dese graef Dirck aldus princelic gehuwet, heeft seer ridderlic die palen sijnre heerlicheyt beschermt tegens die Denen, die doe noch binnen Uutrecht woenden, ende oec diergelijken tegens die Slaven ende Wilten. Ende en konden in Hollant weder geen opslach maken, mer vielen an in Zeelant tot Aremuden. Waerom dat Lodewijc, coninc van Almangen, wes wijf dese Dircs moye was, quam mit veel Ruyssche heren tot Nimmagen, ende sende vandaen desen Dirck, grave van Hollant, tot een hulp ende onderstant tegens den Denen, een vroem ridder van Vrancken gheslacht, Lippoldus, des graven soen, wes vader was die alredoirluchtichste hertoech van Swaven. Ende heeft mit graef Dirck scone feyten bedreven in Zeelant tegen die Denen, van welcke ridder sijn gecomen die heren van Borssalen in Zeelant, na der linie ende ofcoemst hier geset. Want van Vrancken, als van der stamme, is voert gebrocht Lippolt sijn eerste zoen; van Lippolt quam die grote Maroth in Hongarien. Ende van sijn anderde soen Frederick sijn gecomen die heren van Walchy, dye edelste van Oestenrijck. Ende van desen Franck voernoemt sijn gecomen die heren van Borssalen in Zelant, daer dese ridder grote victorie ende zege hadde tegen den ongelovigen Denen, daer die coninc van Almangen, Lodewijc, seer in verblijt was; ende diergelijc oec sijn broeder coninc Kaerle die Caluwe van Vrancrijc, die alle haer dingen broederlic mit malcander deden. Ende dat si aldus dese twe graefscappen wechgaven, bina in eenre tijt, dat deden si om den gemenen oerbaer, wanttet landen waren veer van hen gelegen, omdat se veel anstoets leden van den Denen ende Noormannen die doe veel landen overvielen, waerom dat dese coningen voernoemt desen Dirck daerin setten, omdat hi dese landen voerseit mitten swaerde van des Heyligen Rijcs wegen bescermen soude van den ongelovigen, hebbende liever die manscap daerof, dan of si die heerlicheit ende landen altemael verloren hadden.
Auteursrechtelijk beschermd