Die copie van den brief ende gifte des foreest van Walsda.
Dat X capittel.
Ende siet, doe Dirck aldus mit des conincs brieven in tgraefschap van Hollandt gheset ende gevesticht was, soe heeft hem noch hiertoe sijn moye Emme vercregen van Lodewijck, coninc van Germanien of Duytslant, horen man ende coninc Kaerls die Caluwen broeder, dat foreest van Walsda, dat is Zeelant, mit sekere brieven ende des conincs Lodewijcs gulden vingerling bezegelt in forme hierna volghende.
In der eren ende name der Heyliger Drievoudicheit, Lodewijc, bi der gracien Goeds coninc van Almanien. Wi doen verstaen onsen getrouwen die nu sijn ende namaels wesen sullen, dat Emme, onse gheminde ghesellinne ende wijf, die coninginne, ons badt oft wi gheven wouden onsen lieven ghetrouwen ende haerre suster soen grave Dirck van Hollandt, een foreest dat Walsda hiet, ende an sijn graefscap gelegen is mitten landen in als dat men weyden ende ploeghen mach, ende mittenGa naar voetnoot44 rivieren ende wateren dier inwert ende uutwert lopen, mitten bossche ende heyde dat dien foreest toebehoert. Ende want wi ymmer geneycht sijn onser ghesellinnen begeerte te voldoen, alst betaemt, so hebben wi gegeven ende gheven grave Dirck voernoemt dat foreest mit alle sine toebehoren, also alst voer gheseyt is, vredelick te houden, te besitten ende te ghebruken, sonder yements teghen segghen voer hem ende sine nacomelinghen, oft dien hijt vercopen, uutsetten of geven wil. Ende omdat wi willen dat dese ghifte ten ewigen dagen gehouden worde, so hebben wi desen brief besegelt mit onsen vingerling van goude. Signet des conincs Lodewijcs. Gezo, cancellier in der stede van Othelrijck, aertsbiscop ende overste cancellier heeft dit overgelesen ende ondergeteykent. Gegeven in den jare Ons Heren VIII C ende LXVIII opten XIII dach in aprille.
Hieruut mach men wel verstaen, dat van Doernic of oft hoger, tot Neder-Uutrecht toe, ghelegen onder die II armen van den Rijn (welcke stat PtholomeusGa naar voetnoot45 Navalia noempt, omdatter die scepen bleven leggen, ende tgoet aldaer te verbomen pleghen, mer hierom nu Trajectum, dat is een oversceping, oversettinge oft overtocht genoemt is) bina al een wildernisse ende een woestelick, gryselic, vervaerlic bossche is geweest, ende was geheten tWout Sonder genaden; want wi nu claerlic in desen brieve bevinden, dattet tlant van Vlaenderen ende Zelant dat leste ende uuterste deel van Duytslant ende Bathavia, dat men nu Hollant hiet, hier voermaels al foreesten, wildernissen ende bosschagien sijn gheweestGa naar voetnoot46, ende nu als graefscappen uutghegheven sijn.
Auteursrechtelijk beschermd