Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe grave Dirck van den Hollanders ende Vriesen verdreven wert ende weder mit macht in tlandt ghebrocht werdt.
Dat VIII capittel.

Onlanxs hierna, anmerckende dye Vriesen dat grave Dirck allene in Hollant gebleven ende in vreden was, hilden si mitten Hollanders int heimelic raet, hoe dat si den grave Dirck verdriven mochten, ende maecten tesamen een conspiracie ende verbant om dit mitten

[p. 97r]

wercken te volbrengen. Grave Dirck dit vereysschende ende dit sekerlic vernomen hebbende, toech haestelic tot coninc Kaerl van Vrancrijc, ende gaf hem te kennen den opsette van sinen ondersaten ende der Vriesen. Die coninc dit horende, screef minlick brieven an den paeus Johan die VIII, die op die tijt noch te Ments was opten Rijn, begerende sijns raets wat hi hier in doen soude. Die paeus desen brief gelesen hebbende, dede hi bi hem comen die ambassiaten des conincs, ende nam den brief, ende sneet hem an lange riemen, ende sneet voert die eynden van die riemen boven of. Des avondts ghing die paeus mitten ambassiaten des conincks in enen hof, daer vele bomen stonden, cleyn ende groot, ende nam een swaert ende hilt die grote bomen boven den top of⁴¹, ende dier geliken sommige van den cleynen. Dit dede hi tot III male toe. Die ambassiaten versochten an den paeus om antwoert te hebben op des conincs brief, mer si ontfingen anders geen antwoert, dan dat si den coninc souden seggen wat si van den paeus hadden ghesien int ofcorten van den brief ende der bomen, groot ende cleyn, dwelcke si alsoe volbrocht hebben. Die coninc verstaende des paeus meninge, vergaerde swaer volc van wapenen, ende quam weder in Hollant mitten vromen prins⁴² graef Dirck, ende dede bi nacht die rijcste ende mogenste van Hollant ende Vrieslant van haer bedde halen, ende des anderen daghes dat hoeft ofslaen in teghenwoerdicheit van alle den volcke, ende dier geliken dede hi mede mit sommige van der gemeenten. Als dat volc sagen des conincks ende des graven toernicheit, ende dat si niement ontsaghen, vielen si den coninc ende den grave te voete, begerende gracie ende genade, dwelck hem minlick ghegunt is, ende hebben den grave mit groter eren ende reverencie ontfangen. Ende is van nyewes ghemaect dye eerste grave van Hollant ende heer van Vrieslant doer coninc Kaerl voerseyt, hem daerof gevende enen brief mit des conincs gulden vingerlinc bezegelt, in forme ende van woorde te woerde als hierna volghet.

41 tof op AB.

42 prius AB.