Dat VII capittel.
Van der introductye ende inleydinge des eersten graefs van Hollant.
Doe dese dachvaert volent was, is coninc Kaerle dye Caluwe voernoemt opgeseten, ende quam mit desen Dirck voirseit in Hollant, want hij alsnu daer hende bij was, om den edelen prince Dirc in die possessie der province voerseyt mit gewapender hant te brengen ende te seten. Dit vernemende dye burchgrave van Leyden ende die here van Valkenburch maecten een verbant onderlinc mit malcander, ende vergaerden alle dat volc van wapenen die si crigen mochten, om den coninc Kaerle te wederstaen, ende en wouden desen Dirck voer ghenen graef ontfangen, mer begeerden te bliven mitten Vriesen onder dominacie ende vrydom des keysers. Die coninc ende dye grave Dirck dit verhorende, sijn vromelic tegens henluden ingetreden, ende hebben dair enen bloedigen strijt gheslagen om dye overhandt te houden, in denwelcken veel heren an beyden siden, ende bisonder dye burchgrave van Leiden, mitten heer van Valkenburch verslagen zijn, na welcken strijt alle dat volc van den lande hem submitteerden ende gaven in handen des conincs ende ontfinghen Dirck, grave Haghenen suster soen, voer enen wittachtigen here ende grave van Hollant ende Vrieslant.
Doe dit gesciet was, vertoech coninck Kaerle mit Dirck sijnre broeders wijfs suster zoen mit groot swaer volck van wapenen in Oest-Vrieslant, ende bedwanc se, dat si desen Dirck ontfingen ende hulden als horen erfhere, protesterende ende belyende mit horen ede dat si altijt souden obedyeren ende bliven onder dye graven van Hollant. Na welcker huldinghe coninck Kaerle weder in Vrancrijck ghetoghen is, ende liet Dirck hier in tlandt bliven, daer hi vredelic in sat, ende regeerde een weinich tijts sonder sorch ende vrese.
Auteursrechtelijk beschermd