Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Anno VIII C lXXVII.

Keyseren.

Carolus die II, die men hiet die Cale, is keyser geworden na Lodewijck, daer hi een oem of was, ende sat int rijck VI jaer opt langste. Dese werdt van paeus Joan die VIII gesalvet in zijn IIII jaer sijns paeusdoms, dwelcke Kaerleman ende Kaerl zijn neven, als Lodewijcks sijns broeders kinderen seer quaelick namen, ende vergaderden veel volcs uut Duytslant om horen oem niet alleen dat keyserrijc te benemen, mer oec dat leven. Keyser Kaerl die Cale dit vernemende, is mit een groot heer van volc getogen te Veronen om sijn neven den wech te sluten ende te benemen; ende als hi in die stat van Mantuen in Lomberdien was gecomen, is hi daer haestelick sieck gheworden, ende overmidts een dranck dat hem Zedechias, een Jodes meester, in hadde gegeven, is hi dair gestorven, als Sigibertus scrijft, ende werdt daer begraven. Dese Kaerle die Cale was een seer devoet kersten prince. Hi stichte overal veel kercken ende cloesteren, ende vermeerde seer den dienst Goeds. Hi fondeerde ende began te Compingen, als men noch sien mach, een casteel in alsulcker manieren als te Constantinopel des keysers hof was, ende noemdet van sijnre naem Caropolim. In der selver stat van Compingen stichte hi een cloesterkercke in der eren van Sinte Cornelis ende Cipriaen, ende brochte aldaer haer beyder lichamen, makende ende singende dat respons Cives sanctorum et domestici Dei. Item. Tot Carrophium in Langedock timmerde hi een vernaemt cloester, dair hi insette

[p. 88r]

⁶die Besnidenis Ons Liefs Heren, dat welcke men nu vindet ende versoect tot Antwerpen in Brabant mit groter reverencien ende gracien, als die bullen dat uutwisen ende daer jaerlixs toent. Voert brocht hi tot Sinte Dionijs buten Parijs die doornecroen ons Heren, een van den nagelen ende van theylige hout des cruys; mer dat sweetcleet liet hi te Compingen. Ende denselven dach die zijn oudevader Kaerl die Grote ingeset hadde tot Aken in zijn capelle totter visitacie deser reliquien alle VII jaer⁷ eens, sette dese Kaerl die Cale oec in bi consent des paeus Niclaes deerste tot Sinte Dionijs. Dese keyser Kaerle die Cale ende coninc van Vrancrijck, starf int jaer VIII C⁸ ende LXXXII.

Lange tijt na sijnre doot openbaerde hi hem een monick van Sinte Dionijs' cloester ende een coster van Sinte Quintijns in Vermandoys, seggende dattet God ende Sinte Dionijs sere mishagede, dat zijn lichaem niet begraven en was in Sinte Dionijs' kercke, dien hi also veel gaven doer Goeds eer hadde gegeven; waerom dat si gaen souden tot Lodewijck sinen soen ende den princen des rijcks, dat men zijn lichaem opgraven soude, ende brenget in Sinte Dionijs kerck. Dat welcke also geschiet is, ende wert in Sinte Dionijs kercke begraven voer dat outaer des Heyligen Drievoudicheit.

Item. Onder desen keysers tiden is geweest een groot ende haestich opwater in den maent van junio, also dat int lant van Sassen een dorp van allen rievieren ende wateren seer versceyden in een ogenblic tijts versoncken is, mit alle die husen, menschen, beesten, bomen mitter kercken, dat men daer gheen kennisse of en mochte hebben, datter voermaels yet gestaen hadde, dan men sacht alleen an voer een grote meer. Men seyt dat dese plage geschiede om een onere ende verachtinge des waerden Heyligen Sacraments.

6 LXXXIII AB.

7 jaer jaer AB.

8 aldus C ontbr. AB.