Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen groten storme des zees die in dezen biscops tijden was.
Dat XCV capittel.

In den jare ons Heren VIII C ende LX, doe openbaerde een wonderlic teyken in den hemel, want die sterren worden gesien van allen wegen ende hoeken tsamen te lopen ende vuerige stralen uutgeven; na welke wonderlike teikenen gevolcht zijn drovige jammerlike plagen, als grote ongetemperheit der lucht, stadelike onverdrachlike stormen der winden ende vloden, seer overgaende haer gewoenliken overen ofte terminen, in maniren van eenre diluvien of der vloeden ende volre wateren. Want die Rijn, die voermaels plach te vloyen doer Wijc te Duersteden, Uutrecht, Leyden ende Catwijc in die Westerzee, omme des grote oplopinge ende overvloedicheit des zeeswaters, recht als wilen eer die Jordaen, soe is doe die Rijn afterwerts³⁴⁹ ghekeert, als dat in Hollant, int Sticht ende in die Betue die menschen ende beesten in groter menichten zijn verdroncken ende gestorven, ende om die zoutheits des waters, dat mit gewelt van Catwijc opwert, overmits stormende vlagen der winden gedreven worde, verzoect zijn ende byna tsamelyc nedergestort, dat alle die bomen, die huden te dage van Leyden tot Nijemagen toe in broekige oft in waterige steden opgegraven worden, kenliken gevonden worden, alle eens weges mits den

349 aftewerts AB.

[p. 86v]

storme nedergeslagen, waerom die luden uut Hollant, uut Sticht ende in der Betue mit eendrachtigen rade, opdat sij voort meer niet argers en souden lyden, soe hebben sij van Wijc te Duersteden an beyden sijden een cleine beke uut den Rijn vloiende, geheten die Leck, mit een dijke beslagen ende gemaect, ende hebben also den Rijn horen vloet ende loop na Uutrecht benomen, ende loopt nu na Vianen³⁵⁰ ende Scoenhoven ende voert in die Mase ende in die zee. Ende als die Rijn aldus gestopt was, doe worden die dunen tot Catwijc weder heel, ende scoten ineen, sodat die Rijn ganslijc bi Catwijc gestopt is, daer si in die zee plach te vloijen; ende die burch van Britannien oft die burch te Britten³⁵¹ bleef buten die dunen leggen in die zee verdroncken, daer men noch tfondament of siet als tlaech water is, daer die heren van Wassennaer of gecomen zijn, als voer in Claudius des keysers gesten gescreven staet.

350 Viaven AB.

351 buten AB.