Hoe dat Hungerus ghecoren wert die XI biscop van Uutrecht.
Dat XCIIII capittel.
Hongerus wert na des gloriosen biscop Ludtgers doot eendrachtelic gecoren die XI biscop van Uutrecht, ende was een wijs, geleert, rustich ende doechlic man. In zijn eerste jaer quamen in Hollant mit scepen die Denen, dye men Noormans hiet, vernyelende ende destruerende thele lant, ende wonnen mit stormenderhant die stat van Uutrecht, als die heilige biscop Frederic propheteert hadde, ende versloegen bina alle dye ecclesie mittet gemeen kersten volc, uutgenomen desen biscop Hungerus, mit enige der canoniken, die God die Here conserveerde ende onthilt tot zijnre scapen ende ondersaten behoeft, ende ontquamen, comende totten keyser Lotharijs, als doe monic int cloester te Pruymen. Lotharijs horende dit grote verdriet, wert beroert mit bermherticheit, ende gaf desen biscop Hungero mit zijn canoniken dat cloester tot Sinte Odilien berch, gelegen int bisdomGa naar voetnoot348 van Ludic in den lande van Gelre, bi die stede van Remonde, om aldaer in vreden te leven, ende Goods dienst ijnnichlic te onderhouden, ende oec voer den anloep der Denen bescermt te wezen. Dese biscop Hungerus verwarf, dat die keiser Lodewic van Romen die II confirmeerde alle die privilegien ende vryheden die zijn voervaders der kerken van Uutrecht gegeven hadden.
Auteursrechtelijk beschermd