Hoe dat biscop Frederick in Zeelant int eylant van Walcheren voer, ende dat bekeerde, ende hoe dat barbarysche volc dat eylant wonnen ende verwoesten.
Dat LXXXV capittel.
Als nu die biscop dese vermaninge van den keyser ontfangen hadde, heeft hi hem bereyt om in Zeelant te trecken int eylant van Walcheren. Ende alle ding bereyt wesende, is hi darwerts ghereyst, mit hem nemende sommige notabile ende goedsvruchtige mannen, die mit hem volstandelic dat Woort Goeds prediken ende die sonden der menschen straffen souden. Sommige van den ingeseten des eylants ende die die vrese Goeds hadden ende doechtlicke menschen waren, ontfingen hem waerdelicken als horen here ende geestlicken vader. Andere, die mit groten sonden ende quade feyten besmet waren, bereyden hoer wapenen, om den biscop te wederstaen, indien hi hen enige moyenisse oft lasteringe an doen wilde. Dese heilige man heeft aldaer begonnen desen verkeerden volcke te prediken ende van hore sonden ende onmenschelicken leven hertelicken gestraffet, ende heeft in den eersten tot rechter kennissen ghebrocht den grave Egghert van Walcheren, mit ontallicken veel volcs, ende ontfingen penitencie, belovende te leven als kersten menschen. Ende als die heylige man alle dingen in goeden state ende ordinancie hadde geset, is hi weder vandaen gevaren tot Uutrecht. Corts daerna, is die heylige bisscop doer alle sine gesticht ghevaren, ende quam in Frieslant, daer hi vernam Arriaensche gelove, die si hadden in der Drievoudicheit, die welcke hi mit groter naersticheit endeGa naar voetnoot328 arbeyt uuter luden herten dreef. Onlancs daerna dat die biscop uut Walcheren gereyst was, quam een grote menichte van scepen mit ontallic volc uut Barbarien, ende wonnen dat eylant, ende sloegen den grave Eggert doot, mit vele Franchoysen, ende vinghen veel wiven ende kinderen, berovende ende pilgerende dat eylant van allen costlicheden, ende voerden se in vreemden landen.
Auteursrechtelijk beschermd