Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die coninc van den Denen kersten wert ende van den Friesen verslagen, ende hoe die biscop, Sinte Odulf sant in Frieslant.
Dat LXXXVI capittel.

Int jaer ons Heren VIII C ende XXV, als Haryolt coninc van den Denen (navolger des conincs Otghyer, die opten berch van Roncevalle mit Roelant mede verslagen was) dat heylige kersten gelove lange tijt wederstaen hadde, is hi mit zijn wijf ende kinderen³²⁹ ende mit groter staet gecomen tot Ments opten Rijn bi den coninc Lodewijc van Francrijc, keiser van Romen, ende heeft aldaer dat heylige gelove angenomen, ende dede hem mit zijn wijf ende kinderen dopen. Ende die keiser begaefde hem mit costlicke gaven ende cleinoden ende mit een groot deel lants van Frieslant, ende brocht een groot deel van sinen lande mede totten kersten gelove. Dairna hadde hi een strijt tegen die Friesen, daer hi in verslagen wert. Op dese tijt woende in Brabant bi Machelen, in een dorp geheten Aerschot, een eerbaer goedsvruchtich man genoemt Bodgis. Dese hadde bi zijnre huysvrouwen een zoen geheten Odulf, ende³³⁰ wert een geleert man in der Heiliger Scriften, ende is ten lesten priester geworden. Dese priester Odulf, navolgende die woorden Cristi, heeft vader ende moeder, vrienden ende lant gelaten, ende is gecomen tot Uutrecht, totten heyligen bisscop Fredericum; want hi verhoert hadde, dat in der kercken van Uutrecht vele geestlicke ende religiose geleerde mannen woenden.

329 kinderẽn AB.

330 en AB.

[p. 82v]

Denwelcken die biscop mit groter bliscappen ontfangen heeft, ende maecte ende ordineerde hem canonick van Sinte Salvatoers kercke, daer hi een eerlick ende doechtlic leven heylichlick in leyde. Ende als hi in Frieslant reysde om dat Arriaensche ongelove uut te roden, nam hi desen Odulf mit hem, ende beval hem te bewaren die kercke van Staveren. Ende als die biscop alle dingen in goeden puncten bescict hadde, is hi weder tot Uutrecht gecomen. Ende Odulphus is daer gebleven, lerende ende prekende ende onderwisende den volcke mit goeden exempelen ende conversacien den wech des ewighen salicheits. Ende als hi daer een wijl tijts gheweest hadde, nam hi op weder tot Uutrecht te reysen, want hi zijn leven in dier heyliger conversacien der canonicken leyden ende eynden woude. Ende int oerlof nemen van den ghemenen volcke heeft hi hem een costlic ende scoen sermoen gedaen, vermanende dat si in der liefden Goeds ende sijnre geboden wanderen souden, ende sprac onder andere woerden, propheterende in den Gheest aldus: 'Also ic wel weet dat ghi na mijnre absencie wederom vallen sult in u oude stinckende sonden, afterlatende die wech des salicheits; ende dat doende sullen die ongelovige Denen ende heydenen comen ende verwoesten dit lant, ende sullen u wiven ende kinderen gevangen nemen ende uuten landen voeren'. Ende tot een seker teyken van dien als dat gheschien sal, so wees hi henluden een grote steen, die voer zijn woninge lach, ende seide aldus: 'Wanneer dat ghi siet dese steen sonder enige menschelicke handen oft hulpe geworpen wert in die riviere van tFlye, so sullen dese dingen ende verdrieten u overcomen, ende sal duren also lange als die steen daer versoncken sal leggen. Mer als ghi siet dat dese selfde steen sonder enige menschen hulpe ofte handen weder uuter riviere op tlant sal worden, so suldy van God barmherticheit, rust ende vrede ende ontlastinge van den heydenen vercrigen.' Dat welcke altesamen als dese heilige man propheteert hadde gevallen is, ende dese steen wert huden opten dach ghetoont tot een kennisse des waerheyts, ende leyt in die kercke tot Staveren onberoerlic ende onbeweechlic. Ende die heylige man Odulphus nam oerlof, ende voer weder tot Uutrecht, levende in groter abstinencien, bidden ende waken. Ende is na een deel jaren salichlic in den Here ghestorven op die anderde ydus van junio.