Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese heylige man die biscop desen keyser Lodewijck berispte van sinen onbehoerlicken huwelic.
Dat LXXXIIII capittel.

Des anderen dages sprac die keyser desen biscop Frederick an mit sachten woorden in deser manieren: 'Mijn lieve soen, die ecclesie van Uutrecht heeft di vercoren tot enen vroeden ende naerstigen harder, opdatstu mit dijnre heyliger leringe castien ende bekeren sulste dat sondige volc. Want daer is Walcheren in dinen gesticht, een eylant dat sere berucht is mit groten sonden, daer men of seyt, dat niet alleen die broeder by der suster slaept, mer dye sone metter moeder. Waerom wi di besweren by den almachtigen God, dattu alsulcke onbehoerlicke ende onmenschelicke dingen corrigierste, ende straft se mitten swaerde des bannes ende maledictie.' Ende als die heylige biscop dit hoorde, versuchte hi ende antwoorde aldus: 'Here keiser, uwe mogentheit heeft mi verbonden mit enen groten besweren; daerom, angemerct becoringe des misbruycks, staet mi an di als van thoeft te beghinnen; wantst u oeck dijn nanichte, Judith, des hertoghen Welpes dochter van Beyeren, tot enen wive ghenomen hebste. Waerom ick dy vermane by alsulcker penitencye als daertoe behoert, dat ghy ofstaet ende laetste dat onbehoerlicke huwelick. Ende en laet ghy se nyet,

[p. 82r]

so segge ic u, dat u daer of comen sal scade ende verdriet, die ghi niet ontgaen en moghet. Ende dine landen sullen grote plagen overcomen, tensi datstu penitencie doetste, ende dat wijf laetste.' Na vele andere stichtige woorden die die biscop sprack, began³²⁷ dye keyser hertelicken te suchten, ende sprac mit wenende ogen totten biscop aldus: 'Ic bekenne mijn misdaet, ende ic begere mi na dinen oerdele te beteren, ende belove di dat wijf te laten.' Dese redenen gheeindet wesende, nam die biscop oerlof an den keyser, ende is nader stat van Uutrecht gereyst, daer hi mit groter feesten ende eerwaerdicheit van der ecclesie ende den burgheren ontfangen worde, ende wert mit groter solemniteyten geset in sinen biscoplicken stoel, daer hi sonderlinge in vasten, in beden ende in aelmissen te geven in levede. Ende dye vervallen steden des tempels der kercken ende des casteels dede hij weder repareren ende maken.

327 degan AB.