Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Sinte Fredericus wert die VIII biscop tUytrecht.
Dat LXXXIII capittel.

Fredericus was geboren in Oest-Frieslant, op een slot genoemt Adelen, gelegen bi den dorp van Sesbeerim van edelen ende geboertigen ouderen. Zijn moeder, als sommige cronike seggen, was geheten Konewella, ende was coninc Aldgilts dochter van Frieslant, zoen van coninc Ratbolt, dair voor of ge-

[p. 81v]

seyt is in Sinte Willeboorts tijden. Hoer broederen waren coninc Goldebalt van Frieslant, die opten Roncevalle met Roelant verslagen wert; ende Rathbout, here van Neder-Frieslant, dat nu die heerlicheit van Egmondt is. Mer dese Frederick was noch veel edelre van doechden ende heylicheit. Hi wert in sine jonge jaren gesent van sine goedsvruchtige moeder totten heyligen ende religiosen man Rijcxfrijdt, biscop van Uutrecht, die dit kint lieflic ontfing, ende namt bi hem als zijn uutvercoren soen. Ende hi leerde sere wel, beyde in zeden ende in consten, ende wies op in alre doechden, ende was seer naerstich ende devoet in der diensten Goeds, waerom dat hem biscop Rijcxfrijdt priester maecte, doe hi na insettinge der heyliger statuten der paeusen tot zijn jaren gecomen was. Waerom dat die ecclesie ende gemeenten van der stat van Uutrecht doer inspiracye des Heyligen Geests begeerden ende vercoren den heyligen priester Frederick na des biscops Rijcxfrijdt doot tot enen biscop van Uutrecht. In desen tiden was coninc Lodewijc van Francrijc keyser van Romen, in ene van sine steden gelegen opten Rijn gecomen, brengende mit hem sine huysvrouwe genoemt Judith, die zijn nanichte was, des hertogen Welpens dochter van Beyeren. Ende quamen aldaer uut vresen der biscoppen van Walslant, die se vervolchden om van malcanderen te doen sceyden, want si in onbehoerlicker echten, als in maechscappe, te samen saten. Ende die keyser en woudse niet laten. Die keyser verhorende den doot des biscops Rijcxfrijdt, geboot den religiosen ende oudesten priestere ende canonicken der kercken van Uutrecht dat si desen Frederick kiesen ende nemen souden tot enen biscop. Dat gedaen sijnde, sende hi notabele legaten tot Uutrecht, begerende bi alle gracien, dat hi bi hem quame, ende tot sijnder electye consent wilde geven. Dese heylige man is darwerts getogen, in meninge den keiser te onderwisen, dat hi niet nut noch bequaem en ware sulken digniteyt ende ordene an te nemen. Mer doer grote instancie, supplicacien ende beden die an hem van den keyser ende den ghemenen volcke gedaen worden, is hi ten lesten bi bedwange, al dede hijt node, van sommige biscoppen, die daer tegenwoerdich waren, ghewijdt ende geconsacreert die VIII biscop van Uutrecht. Ende die keyser investeerden, ende gaf hem staf ende vingerling mit groter waerdicheit. Ende die keiser dede bereiden een grote costlike maeltijt, ende verblide hem sere van deser electie³²⁶ ende intronisacie des eerwaerdigen biscops, want hi hem sere beminde ende liefhadde om sijnre doechden ende oetmoedicheits willen.

326 elettie AB.