Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese keyser Lodewijc confirmeerde die goeden ende thienden gegeven der kercken van Uutrecht.
Dat LXXXII capittel.

In den Name ons Heren ende Gesontmakers Cristi. Amen. Wi, Lodewijck, by der Godlicker voersichticheyt keyser van Romen, altijt vermeerder des rijcs ( wanttet nyet alleen der keyserlicker hoecheit betaemt onverbroekelic³²⁴ te onderhouden die dingen zijnre voersaten, mer die oec mits zijnre auctoriteyt ende macht te vestigen ende confirmeren ( so doen wi weten allen onsen getrouwen ondersaten die nu zijn oft namaels wesen sullen, als dat die eerwaerdige vader ende here Ricxfrijdt, biscop der ouder kercken van Uutrecht, die gesticht ende gefondeert is in der eren des heyligen confessoers Sinte Martijn ende anderen heyligen, ons ghetoont heeft enighe auctentyke brieven, hoe dat onse here vader saliger gedachten die goedertieren Kaerle, keyser van Romen, altijt vermeerder des rijcs, ende onse oude vader Puppijn ende horen voersaten, gegont ende gegeven hebben tot behoef der voorseyder kercken alle die thienden van allen dienstknechten, beesten, landen, tollen, comanscappen ende van allen dingen daer onse rentemeester tollen ofneemt ende eyschet. Ende dat die mannen ende menschen der selver kercken die onder die voechdye ende protectie der voorscreven kercken staen, ende dye daer wonen in den landen van Wijck te Duersteden, sullen vry ende quijt sijn van allen exactien ende scattinghen, ende dat hem niements in ghenen dingen hier in moyelic oft scadelic wesen sal, opdat die biscop mit sine ecclesie te vrilicker ende rustelicker den geestlicken luden ende anderen sinen ondersaten horen nootruft sal mogen geven, ende³²⁵ dat licht in der kercken continueren ende den ongelovigen menschen ende heidenen die si tot kennisse des kersten geloves brengen ende bekeren sullen mogen voeden ende leren. Om welker saken ende dingen vasticheit heeft ons gebeden die eerwairdige biscop voorscreven te willen ordineren navolgende die manieren onser voirsaten coningen een gebot onser auctoriteits ende machts doir die liefte Gods ende eerwaerdicheits des heiligen confessoers Sinte Martijns, wiens supplicacie ende beden wi goetwillichlicken hebben verhoert, ende die mit onser auctoriteyt ende macht weder gestarct, als dat alle datghene dat voir gescreven ende geroert staet sal die voorseide kercke van Uutrecht behouden ende besitten, ende dat hem niements vermete hier inne lastich oft mit onrechte moyelic te wesen. Mer alsoet van onse here vader ende oudevader ende voersaten coningen ende van ons, bi onser auctoriteyt ende macht, geset, geordineert ende confirmeert is, dattet also tot ewigen dagen onverbrokelic gehouden ende bewaert worde, opdat die knechten Goeds ende dienren Goeds die daer zijn, mit horen here ende biscop ende alle dieghene die si van der dwalinge des ongeloves bekeren ende brengen sullen, tot rechter kennisse des geloves te vuerichlicker ende stadelicker voer ons, onse huysvrouwe ende onse kinderen ende voer al dat kersten volck, onse ondersaten, sullen mogen bidden ende die Godlicke bermherticheit vercrigen. Ende opdat dese onse tegenwoirdige confirmacie cracht ende vigore hebben mach, hebben wi desen brief doen vestigen mit onsen vingerling gegeven.

324 onverbroekelic AB: de tweede "e" is te vet afgedrukt: het zou ook een "c" kunnen zijn.

325 en AB.