Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese keyser Lodewijc vervoert worde van dene stede totter anderen, ende hoe hi ten lesten uuter vangenissen quam.
Dat LXXIX capittel.

Doe die wederpartien ende Lodewycs zonen vernamen dat dien clachten van hoers vaders vangenissen onder den gemenen volcke ende veel der princhen altijt meer ende meer vermeerde ende wijes, so vreesden sij, dattet hem qualic mochte vergaen. Waerom dat Lotharijs tot sinen vader quam, ende brocht hem van der vangenissen uut Swessioen tot Compingen, ende vandaen voert tot Aken. Mer want doe dat geroep des gemenen volcs also groot worde omdat die coninc versteken ende gevoert was in vreemden landen, wert hy van Aken wedergebrocht tot Sinte Dijonijs int cloester. Ende onlancs daerna, dat Lotharijs sinen vader daer hadde gebrocht, quamen uut Burgondien grave Aubericus ende Berardus mit groter heervaert, ende senden tot Lotharys hoer ambassaten, te weten Reimbalt ende Gautelyn, begherende dat hy den keyser, sinen vader, op sine vrije voeten setten wilde, ende indien hi dat dede, dat hi in sine digniteyten oft andere saken niet vermindert en soude wesen. Ende indien dat hi oec niet en dede, so wouden sij den keyser mit gewapender hant uut sine mogentheit mit crachte nemen. Dit horende Lotharys, verlossede ende sette op sinen vrien voeten den keyser, sinen vader, in Sinte Dijonijs kerke. Daer terstont om den keyser ende den coninc Lodewyc te grueten mit³¹⁴ groter macht ende eren quamen die voorscreven heren van Bourgondien myt veel andere vorsten, princhen, biscoppen ende prelaten, begerende dat hi sine digniteyt ende ridderlicke oerde weder annemen woude, dwelke hi vertoefde te doen, totdat hi bi der biscoplicker raet ende auctoriteyt purgeert was; dye hem voermaels hadden condempneert ende veroerdelt. Mer nadat hi reconcilieert ende verenicht was, ontfing³¹⁵ hy dye ridderlicke oerdene mitter keyserlicke crone, ende toech onlancs daerna tot Corsiacon, daer oec doe bi hem quamen sijn II sonen, Puppyn ende Lodewijc, mit veel andere, denwelken die coninc minlic ontfing³¹⁶, ende vergaf hen uuter herten dat si tegens hem misdaen hadden. Vandaen quam hy tot Aken, daer bi hem quam Judith, syn keyserinne ende wijf, comende uut Italien, daer sij in ellenden geweest was. Mer Lotharijs versmade zijn vader, ende dede veel quaets in Bourgondien. Hi verbrande ende beroefde die stat Cabiloenen mit die kercken ende tempelen. Waerom dat die keyser Lodewijc mit sijn sonen Lodewijc ende Puppijn tegen desen Lotharys, sinen oudsten zoen, te velde gecomen is, ende sloech sijn tenten neder opter rivieren Tijzun genoemt. Lotharys vernemende dat zijn II broeders in gracien van horen vader gecomen waren ende tegen hem toeleyden, verloer hi al sinen moet, ende quam tot sinen vader den keyser mit oetmoedicheit, ende begeerde remissie ende genade, swerende voertan mit alle sine edelen den keiser hout ende getrou te wesen. Ende hi toech weder in Ytalien, sceyende van zijn vader mit groter vrienscappen.

314 mie AB.

315 ontfincg AB.

316 ontfincg AB.