Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Kaerl die Noormannen verwan, ende der Denen coninc in gracien nam, ende hoe hi tot Romen reysde ende mit groter eren ende blijscappen ontfanghen wert.
Dat LXVII capittel.

In den jaere ons Heren VIII C rebelleerden die Noormanners weder tegen coninc Kaerle, ende braken horen eet ende lofnisse, doende veel scaden van roven ende branden in Walslant. Tegen desen heeft die coninc een grote menichte van scepen vergadert, ende sant se op die see, ende heeft mits desen die Noormans weder onder sine gehoersamheit gebrocht. Hierna heeft coninc Godefrijt van den Denen notabele ambassaten gesonnen tot coninc Kaerle, begerende mit alre oetmoedicheit remissie ende gratie zijnre misdaden, want hi des conincs vrienden sere moijelic geweest hadde; ende dye coninc heeften in genaden genomen. In ditselve jaer, in die Vasten, als die coninc lange tijt tot Aken zijn coninclike woenstat gehouden hadde, is hi uut Duislant gereist in Walslant, ende heeft sinen heiligen Paeschdach gehouden in Sinte Richarius' cloester, ende is vandaen na die hoechtijt getogen tot Tours, om Sinte Martins reliquien ende heiligen lichame te visiteren, ende bleef aldaer een wenich tijts, ende reisde doe weder in Duijtslant, ende quam tot Ments opten Rijn. Daer wesende, vergaerde hi aldaer vele heren, princen ende vorsten van alle sine landen, houdende een generale dach-

[p. 74r]

vert in die oestmaent om tot Romen te trecken ende alle onvrede ende twiesten uuten wege te leggen die int opnemen des paeus Leo gesciet was. Ende als alle dingen ende saken ordineert waren, stelde hi hem te wege²⁹⁰ mit groten staet ende vele volcs van wapenen, ende quam eerst in die stat van Ravenne, daer hi VII dagen sinen rust in nam. Na welken hi sende sinen soon Puppyn mit veel volcs van wapenen in Poelge om dat hertoechdom van Beneventen te bescermen voer den oploep der vianden, ende hi haeste hem tot Roemen te comen. Daer hem die paeus Leo mit alle sine cardinalen, biscoppen, abten ende prelaten, mit alle die geestlicheit te moet quam; diergelijc die prefect oft rechter van Romen, mit alle sine waerlike heren, rechteren ende senatoren sonder getal, ende ontfingen hem als een bescermer des Roomschen rijcs, ende als een voecht, momber, gouvernuer ende patricius van Romen, mit groter reverencie, triumphe ende waerdicheit, ende geleiden hem mit groter vrolicheit ende feeste in Sinte Peters kercke. Des anderen dages, als op Sinte Andries dach, quam die coninc mit enen betameliken ende heerliken staet van princen, heren ende vorsten in Sinte Pieters kerck, om den dienst Goods te horen. Daer doe op die graden des tempels die paeus Leo stont, mit alle sine prelaten ende ecclesie, ende ontfing den coninc mit groter eerwaerdicheit ende feeste, ende geleyden in Sinte Peters kerc. Daer oec die Romeinen mit devoter herten ende lovesangen dancten God den Heer, dat Hi hen alsulken waerdigen moderatoer ende bescermer hadde begeven, wiens gelijc in macht, in doechden, in rijcheit ende eerbaerheit nije in der werlt gesien en was, waerom dat die Romeinen niement der keiseren of der coningen alsulke eer ende glorie bewesen hebben, voer of na, in der gehoechnissen der menschen of scriften, als sij desen Kaerl, coninc van Franckenrijc deden. Hierom die coninc comende in der kercken, heeft mit devote gebeden, mit puijre herten, mit uutgestorte tranen, Sinte Peter angeropen ende sine hulp begeert, tot Goods eer, sijns ende alre menschen salicheit. Ende bleef daerna lange tijt te Romen, reparerende, vernijewende dye vervallen kercken ende cloesteren, die hi dagelixs mit groter devocien visiteerde, ende voede minlic den armen; ende hi leide ter neder ende verenichden alle twist, discorde ende gescillicheit der Romeinen ende den paeus²⁹¹ als voer gescreven staet ende noch na geseyt sal worden.

290 aldus C; wage AB.

291 paeuñ AB.