Hoe dat hertoech Heric verslaghen wert in Poelgen ende hertoge Geralt van Beieren van den Hunen, ende hoe hertoech Gwije den Engelschen wederbrochte tot subjectie des conincs.
Dat LXVI capittel.
Int jaer VII C ende XCIX rebelleerden tegen den coninc enige steden gelegen in Poelgen, als Lucerien, Ostroie ende andere. Tegens welcker rebellicheit sende die coninc den hertoghe Heric, die se weder gebrocht heeft onder des coninc Kaerls macht ende gehoersamheit. Mer nadat hi vandaen toech in Liburnien, dat men nu hiet Croacien, ende is een deel der Slavenlant, worde hi mit bedroch oneerlic gedoot, waerom die coninc in groten rouwen quam, want hi veel striden mit zege ende victorie gevoert hadde. Int selve jaer wert oec verslagen in Hongerien hertoge Geralt van Beijeren, als hi den kersten menschen begeerde te bescermen tegens den ongelovigen Hunen, van denwelken men leest dat hi van God onder den martelaren gerekent is. Op dese tijt sende coninc Kaerl sinen hertoge ende cappeteine mit veel volcs van wapenen opten Engelschen, die doe weder rebelleerden. Diewelke mit groten swaren striden den Engelschen wedergebrocht heeft onder die subjectie des conincs, betalende jaerlix grote sware tributen ende scattingen. In dit jaer begeerden die Hunen oft Hongers van den coninc dat sij hoer woenstat mochten nemen tusschen Sabarien ende Carautanen, want sij boven maten gequelt worden ende bevochten van den Slaven, Bremers, Poelanders ende Wandalen, also dat sij niet in rusten bliven en mochten. Ende hierom begeerden sij hoer lant te rumen ende een ander plaets te bewonen bi des conincs consent ende wille. Dat welke die coninc hen gegont heeft int selve lant te trecken, op condicien dat sij altijt sonder coninclike naem ende digniteyt souden staen onder des conincs jurisdictie van Franckenrick ende sine naecomelingen; dwelc also gesciet is.
Auteursrechtelijk beschermd