Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe coninc Kaerl een concilium dede vergaderen ter causen van eenre ketterie in die stat van Wirtzburch.
Dat LIX capittel.

[p. 72r]

Hierna, int jaer van VII C ende XCI, quam coninc Kaerl in der stadt Wertzburch, ende bleef die hoechtijt van Paeschen, daer hi vergaerde mit groter naersticheit ende vuericheit dien hi droech totten kersten gelove een concilium van allen biscopen ende abten sijns rijcks, om te verdriven alle ketterien, ende om alle dinck te ordineren na der eendrachticheit der Heyliger Roomscher Kercken; want onlancs daer te voren in Beyeren wesende, vernam hi datter in der stadt Orgellis gelegen, in den bergen Pyreneen, die Spangen sceyt van Walslant, een biscop was, Felix genoemt, die een quade ketterie ende opinie voer hem nam, seggende dat Cristus Goods natuerlicke ende geboren Soen niet en was, mer alleen sijn adopteerde ende angenomen soen. Dese biscop stont weder mitter Heyliger Scriften een ander biscop van Tholeten, Helipandus genoemt. Mer doe dit quam tot kennisse van coninc Kaerl, vergaerde hi terstont een concilium van veel biscoppen, abten ende doctoren in der stat van Regensburch. Ende nadat dese Felix verwonnen was, ende als een ketter verwesen, sende hem coninc Kaerl totten paeus Adriaen, begerende niet te doen sonder sentencie der Roomscher kercken. Comende dese Felix te Romen totten paeus, revoceerde ende wederriep openbaerlick alle sine erroren ende dwalingen in Sinte Peters kerck, ende die paeus absolveerden, ende senden weder tot sinen biscopliken stoel, also als coninc Kaerl oec van den paeus begeert hadde uut een goet hart dat hi altijt dragende was totten biscoppen ende priesteren ende andere geestlicke personen ende prelaten. Dit is dan die oerspronck²⁸⁰ ende sake waerom dat die coninck concilium celebreerde ende hielt tot Meyenburch, vresende of die voernoemde ketterije oft andere yet in sine landen mochten voertspruten. Tot welcker vergaderinge sende die paeus Adrianus voerscreven twe legaten, Stephanum ende Theophilactum, beide biscoppen ende cardinalen. In welcke concilie sijn vele profitelicke dingen ingeset tot eendrachticheit der heyliger kercken. Ende terwilen dat die coninck in dit heylige werck becommert was in der stadt voernoemt, is oflivich geworden sijn coninginne Fastraert; ende wert mit groter eren ende betamelicker uutvaert begraven bi Ments in Sinte Albaens kercke

280 oersponck AB.