Hoe dat coninc Kaerl verwan die Noormanners mit enen stride.
Dat LX capittel.
Int jaer VII C ende XCII sijn gecomen tot coninc Kaerl die Abdoriti, dat is tvolc wonende an beiden siden van die scoot der zee die na toest loopt, ende sijn buerluden mitten Noormanners. Dese uut ouder vrienscap die si altijt mitten Franchen hilden, quamen tot coninc Kaerl om van hem hulp te hebben tegens den Noormanners, daer si dagelicx of bevochten ende bescadicht worden. Die coninc beloefde hemluden assistencie ende bistant te doen, ende vergaerde terstont een grote heervaert van veel gewapents volc om sine vrienden tontsetten ende quam daer ende verwan die Noormannen, ende brocht se daertoe, dat sij mosten sweren nemmermeer strijt an te nemen, noch tegens den Abdoriten, noch tegen nyemant anders, dan bi sinen consent ende wille. Mer onlancs daerna heeft hertoge Godefrijt van Normandien den Abdoriten grote injurie ende overlast gedaen. Waerom dat die coninc sere verstoert ende toornich was. Ende quam weder mit groot volc te water ende te lande; mer hi en merrede daer niet lanc, want God vacht voer hem. Want hertoge Godefrijt wert van sijn selfs dienres verslagen, die uut sijn sotte hoverdicheit vermetel was, beroemende sijn tenten voer Aken neder te slaen, ende des conincx slot ende sale te destrueren; mer tis anders gevallen.
Auteursrechtelijk beschermd