Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Dat LVIII capittel.
Hoe dat die Fransse heren enen groten strijt hadden tegen die Hunen, die si wonnen, ende hoe coninc Kaerl dede bouwen die kerck tot Aken.

Na die solemniteyt van Paesschen int jaer VII C ende XC heeft coninc Kaerl opgenomen den Hunen mit alle sine macht te bevechten ende tot niet te brengen, dede hi maken ende bereiden bruggen van grote scepen over die riviere van der Danouwe, ende heeft int selfde jaer Puppijn, sinen soen, coninc van Ytalien ende hertoge Herick van Aquilegien mit groter heervaert uut Beyeren ende andere nacien, gesonnen in Pannonien oft Hongerien²⁷⁸ om dat rijck ende den naem der Hunen te vernyelen ende uut te doen. Comende int lant, hebben si enen groten, bitteren strijt gehat tegen die Hunen, in denwelken die coninc Hyring mit ontallicke Hunen ende vele van den edelen verslagen zijn, ende also vernedert, als dat si hemselven voertan niet en conden bescermen, die voermaels altijt andere landen plegen sonder saeck te bevechten ende te overvallen. Want in desen²⁷⁹ slach is alle der Hunen glorie ende edelheit vergaen, nadat se vromelic wel VIII jaren hem verweert hadden. Ende alle dat ghelt, scat ende goet dat si voermaels uut vele landen conquesteert ende tsamen vergadert hadden, is nu gecomen in der Franchen handen; waerof dat die historiscrivers scriven, datter nye strijt van den Franchen volbrocht en is in der menschen memorie, in diewelke si meer eerts begaen ende scat vercregen hebben. Want also veel geroofts goet ende ponden van goude ende silver hebben die Franchen in desen strijt den Hunen rechtelic benomen, als si in veel jaren van menige landen ende provincien onrechtlic geplondert hadden. Ende na dese grote victorie quamen die Franche heren als coninc Puppijn van Ytalien ende hertoge Herick van Aquilegien tot coninc Kaerl, die op die tijt tot Aken was, brengende mit hem een ontallicke scat der Hunen. Ende presenteerden dair oec een grote menichte van edelen gevangens, mitten bannieren der vorsten ende princen uut Pannonien. Die welke prysonyers hem getroulic gaven onder den coninc, ende lieten hem dopen, ende worden alle kersten menschen. Ende die coninc sant se mit groter eren beghift ende begaeft weder in hoer landen. Van deser victorie ende zege heeft die coninc God van hemelrijc grote dancbaerheit bewesen, ende sende van desen scat der Hunen mitten abt Agilpert van Sinte Rijcharius cloester coninclicke ende mildelicke gaven Sinte Pieter ende andere kercken in zijn rijcke die die Hunen hier voertijts seer scadelic verwoest ende beroeft hadden. Ende van denselven scat begaefde hi oec mede sere hoechlicken sine princen ende vorsten ende andere vrome ridderen, ende deelde oec mede uutermaten mildelic den armen ende miserabilen luden ende crancken menschen. Ende van desen scat dede hi oec mede fonderen Onser Liever Vrouwen kerck tot Aken, tot welker fabrijck dede hi comen costlicke pylaernen ende marmer stenen ende andere ornamenten van Romen ende Ravenne, ende dit wert binnen den tijt van VI jaren voleindet, int jaer VII C ende XCVI.

278 Het verkortingsstreepje boven de laatste e is vrij kort; AB.

279 dseen AB.