Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Kaerl enen groten strijt hadde teghen den Griecken, die hi verwan.
Dat LIIII capittel.

In den jare VII C ende LXXXVI sende Constantijn, Hyrenen soen, keyser der Griecken, notabele

[p. 71r]

ambassiaten ende mannen totten coninc Kaerl, begerende dat hi hem ghewaerdighen²⁷⁵ wilde sijn dochter te geven tot een echte wijf. Coninc Kaerl dese bootscap eerwaerdelic ontfangende, en gaf terstont gheen antwoert op dese commissie ende begeerte, angesien dat Constantijn mit zijn moeder Hyrene die keyserinne sere qualicken stont, als voer ghescreven staet, ende oec mede bisonder dat men vermoede ende seyde int heimelic, dat Constantijn malaets of pockich geworden waer. Ende hier om want coninc Kaerl zijn antwoert vertoefde, soe sijn die ambassaten mit indignacie ende onwaerde van hem gesceyden. Ende comende totten keyser Constantijn, hebben si qualicken van coninc Kaerl gesproken mit logentalen, ende brochten den keiser dairtoe, dat hi Theodorum den prince sende mit groot swaer volc om die landen van Ytalien ende daeromtrent te verwoesten ende destrueren. Ende quamen alre eerst int hertoechdom van Beneventen in Poelgen, ende branden daer, ende beroefden vele steden ende dorpen, tegen die welke coninc Kaerle terstont sant mit groot volc van wapenen Grimolt, hertoge Aragisen²⁷⁶ soen voornoemt, die hi by hem hadde in ostage, als voorseyt is, mitten hertoge Hildebrant van Spoleten; ende verdreven den Griecken weder uut Ytalien ende Poelgen, afterlatende vele van hoere edelen, princen ende heren. Ende die voervluchtich waren quamen in Calabren, leggende in Poelgen, ende deden daer grote scade. Des conincs cappeteinen Grimolt ende Hildebrant dit vernemende, zijn se gevolcht, ende dair geviel weder een grote strijt; mer die Grieken worden weder vluchtich ende lieten daer mit allen veel volcs, ende dander liepen uuten lande, wanttet een volc is scarp van tonge, mer slap van handen. Ende dese II princen zijn mit groten zeghe ende victorie weder ghekeert by den coninc, ende mit groter bliscappen ontfangen.

275 ghewaerdignen AB.

276 Aragil en schijnbaar, door beschadiging s AB.