Hoe dat die Engelschen mitten verlopen Sassens rebelleerden ende hoe die coninc tot Romen reysde ende thertoechdom van Poelgen wan.
Dat LIII capittel.
In den jare VII C ende LXXXV setten hem die Engelschen in rebelheit tegen den coninc, doende veel scaden in des conincs landen, mit sommige verlopen ende verbannen Sassens. Ende beroofden die coopluden te water van live ende goet, waerom dat die coninc noch in Sassen becommert wesende, sende tegen den Engelschen sinen senescal hertoge Adolf mit groot volc van wapenen, die se mit manlicker cracht wederbrochte onder des conincs Kaerls subjectie ende gehoersaemheit, ende nam mit hem uut Engelant vele princen ende edelen gevangen, ende brocht se totten coninc. Int selfde jaer maecte coninc Kaerl vrede in alle sine landen, ende toech mit een groot heer van volc te Romen om den hertoge Aragijs van Beneventen in Poelgen te bedwingen. Ende die coninc quam tot in der stat van Florence, ende hilt daer den heyligen hoechtijt van Kersdach. Comende van daen te Romen, wert hi van den paeus Adriaen ende sine cardinalen ende van allen den Romeinen mit groter eren ende bliscappen ontfangen. Ende als die coninc een wijl tijts binnen Romen hadde geweest, ende hem wel bereit hadde om den hertoge van Poelgen te bevechten, is hi mit groter snelheit, eer men tconde gheweten, in der stat van Capua, in Chanpangen, int rijck van Neapels, mit groot volc ghecomen. Dit vernemende die hertoge Aragijs onthilt hemselven besloten in die stadt van Salernen; ende merckende dat hijs tegen den coninc niet houden en mochte, sandt hij sijn II zonen Rumolt ende Grimolt, mit veel ander edelen, mit costlicken ghiften, gaven ende cleinoden van goude ende silver, ende gaf hem mit alle sijn hertoechdom ende landen onder des conincs gehoorsaemheit, swerende ende belovende dat hi voertan den coninc onderdanich soude bliven, ende nimmermeer tegen hem rebelleren. Waerom dat hem die coninck in gracien nam, ende hilt bi hem in ostage Grimolt, des hertogen jonger soen, mit noch ander XI edele vorsten die tot hem gesonnen waren. Mit aldusdaniger composicien is die coninc weder te Romen gecomen, ende heeft daer mitten paeus die hoechtijt van Paesschen mit groter feesten ende blyschappen ghehouwen.
Auteursrechtelijk beschermd