Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat coninc Kaerl den hertoge van Beyeren overwan, ende hoe hi die Hunen uut Ytalien verdreef.
Dat LII capittel.

Int selfde jaer rebelleerde tegen coninc Kaerle, Tassilo, hertoech van Beyeren, doir informacie ende ingeven zijns wijfs Lutgaert, coninc Desiderius' dochter van Lomberdien, dien tseer leet was dat hoer vader van den coninc verdreven ende gevangen was, waerom dat si doir hoer man veel quaets dede int rijc. Ende toech dat naeste volc van den lande tot hoerre gonsten ende diensten, doende den coninc ende sine ondersaten vele scaden ende verdriets. Die coninc dit vernemende, is sonder vertreck tegens desen hertoge van Beyeren te strijt getogen mit III heren ende battaelgen van volc ende mitten Sassens. Ende doe die coninc dat lant van Beyeren naecte opten riviere Lecchun, die Hoech-Duitslant sceit van Beieren, sant hi uut sine ambassaten totten hertoge Tassiloen, vragende hem of hi liever hadde tondersoeken der Francken sachtmoedicheit, dan hoer wapenen ende toornicheit. Dese

[p. 70v]

Tassiloen dit horende, wert sere vervaert, ende gaf hem over mit dieper oetmoedicheit in des conincs gracye ende handen, belovende mit sware juramenten ende eede, dat hi nimmermeer tegen den coninc rebelleren en soude, gevende sijn eygen soen Theoen mit vele andere Beyersse heren tot een onderpant sijnre gehoersaemheyt. Waerom dat die coninc vandanen ghetogen is, ende quam op sijn slot tot Inghelheim opten Rijn, ende bleef daer die winter lang. Hertoge Tassiloen diergelijcken thuys comende, ende sijnre loftenissen ondachtich wesende, heeft die Hongersse ende Hunen mit ghiften ende gaven solliciteert doer informacye sijns wijfs²⁷⁴, dat si den coninc ende sinen landen souden anvechten ende bestriden, dwelck si deden. Ende quamen mit II scaren van volc uut Hongerien, ende traden mitten enen hoop in Ytalien, ende mitten anderen in Beyeren, recht oft tegens des hertogen sinne ende wille hadde gheweest. Coninck Kaerl dit vereysschende, vergaerde alle sine princen ende heren op tslot tot Ingelheim voerseyt, onder diewelcke dat oec dese hertoghe Tassiloen van Beyeren seer stoutelic als conincs gesworen ende ondersaet medequam. Mer hi wert aldaer beclaecht van sijn eygen heren, dat hi die Hunen daer selver hadde doen comen om den coninc ende sine landen ende ondersaten te crencken ende bevechten. Ende als men dit in der waerheyt aldus bevant, is hertoge Tassiloen van den princen ter doot veroerdelt, mer die coninc heeft hem doer sine natuerlicke goetheit opgenomen, ende sijn lijf weder gegeven mit condicien dat hij mit zijn soen Theoen in een cloester soude gaen ende daer haer leven lang in bliven. Ende die coninc toech doe van stonden an mit alle sijn macht, ende verdreef die Hunen uut Ytalien, ende heeft se verwonnen, ende keerde weder mit groter zeghe ende victorie.

274 wĩjfs AB.