Hoe dat die II hertogen oft coningen van Sassen, Widikind ende Alboen, dat heylige kersten gelove annamen.
Dat LI capittel.
Hierna sijn die Sassens wederom rebel geworden, dwelcke den coninc seer verdroot ende leet was om horen, waerom dat hi dede vergaderen ende bieencomen alle dat volc dat hi crigen ende verwerven mochte. Ende nam mit hem sine coninginne ende huysvrouwe Fastraert mit horen jongen sone, ende is mit al dit volc gecomen in Sassen, ende destrueerde alle hoer sloten, fortressen, blochusen, steden ende dorpen daer hi bi quam, ende bleef daer leggen die gantse somer ende winter bi sijn wijf, die hi mit horen enigen soen op een starck slot hadde geset. Mer doe die somer des navolgende jaers began te comen, heeft hi een generale dachvaert gehouden in der stat van Paderborne, mit alle sine vorsten, princen ende heren. Nadat dese dachvaert gheeyndet ende gehouden was, is die coninc getogen mit groter macht int noorden van den lande van Sassen; ende comende int dorp Bardango, vernam hi dat int eynde des riviers van der Albe, op die frontieren des rijcs van Pannonien lach versteken die coninc Widikind van Neder-Sassen, ende Alboen, coninc van Hoech-Sassen, ende scaemden hem te comen in die tegenwoerdicheit des conincs Kaerls, overmits hoer grote excessen ende misdaden die si tegen den coninc hadden gedaen, als voerseyt is, dat hem nochtans seer leet was. Totten welcken die goedertieren ende sachtmoedige coninc sonderlinge wise ende notabele mannen gesonnen heeft, ende dede hem beyden weten dat hi alle hoer meynedicheit ende misdaet gaerne vergave, indien si die afgodyscap laten wouden, ende dat heilige gelove ende doopsel annemen, ende God ende hem altijt sonder beveynstheit ghetrou ende gehoorsaem bliven wouden, hi woude se alsdan minlicken ontfangen ende grotelic eren ende princelic begaven. Dese II dit horende, ontfingen des conincs gracie ende genade mit dancberheit, mer si ontsagen hem totten coninc te comen, overmits hoer sware ende lelicke feyten ende excessen, die se bedreven hadden, ten waer dat die coninc enige zijnre heren ende princen in oestage ende pande tot hem woude senden. Waerom dat die coninc daer gesonnen heeft Amulijn, den prince van des conincs palaes, mit meer andere grote heren ende princen. Ende als die coninc alle dingen in rusten ende vreden hadde geset int lant van Sassen, reysde hi weder in Francrijc, int dorp Attiniake; ende ten lesten zijn dese II princen Widikind ende Alboen gecomen bi den coninc, ende hebben mit groter devocien dat heylige doopsel ontfangen, blivende God ende den coninc voirtan altijt getrou ende goede kersten menschen.
Auteursrechtelijk beschermd