Hoe dat coninc Kaerl sinen soen Kaerle mit een groot gerit van paerden in Sassen sende.
Dat L capittel.
Corts hierna, int jaer VII C ende LXXXIIII, rebelleerden die West-Phalers wederom tegen den coninc, waerom dat hi sonder toeven vergadert heeft een groot heer van volc te paerde ende te voet, ende heeft se gesonnen mit sinen sone Kaerle om den rebelligen West-Pahlers te bedwingen ende castien. Ende comende bi dat dorp Dremi, daer die West-Phalers vergadert waren, heeft hij se haestelic overvallen ende veel verslegen, ende den anderen verjaecht ende voervluchtich gemaect, ende behilt zege ende victorye mit groter bliscap. Daerna heeft hi thele lant van Sassen doergelopen totter riviere Ambra toe, ende nam sijn logijs in een slot gheheten Swatrouburch, ende hilt daer den heyligen dach van Kersdach. Ende bleef daerna lange tijt in Heresburch, want hi in die noortside des lants niet comen en mochte, ende is wederom, onlancxs daerna, tot sinen vader gecomen.
Auteursrechtelijk beschermd