Hoe dat die coninc weder in Sassen quam, ende heeftet bina gedestrueert ende te nyete gemaect.
Dat XLIX capittel.
Daerna, in den jare VII C ende LXXXIII, coninc Kaerl anmerckende dat die Sassens nimmermeer in sine gehoorsaemheit en souden bliven, hoewel dat si nochtans dicwils verwonnen waren, ende begeerde desen strijt, die lange tijt geduert hadde, eens te einden, want si noch geloef noch loftenis en hielden. Ende heeft weder een groot ontellic machtich heer van volc vergadert, ende isser mede gecomen in Sassenlant, ende began in den eersten te bevechten die West-Phalers, ende hoer lant te verwoesten, husen ende woningen te verbranden, ende dat ghehele lant ende volc te vernyelen, ende daer na thele lant van Sassen van der riviere die Weser totter plaetsen die men hiet Huculbi, ende van daer doer Duringhen comende, beroefde hi hele Sassen lant gelegen tusschen die rivieren Albia ende Sala, totter plaetsen genoemt Scamugi, ende heeft se boven maten vernedert ende te nyete gebrocht.
Auteursrechtelijk beschermd