Hoe dat die coninc Widikind weder in Sassen quam, ende hoe hi een grote strijt wan opten Fransschen heren.
Dat XLVIII capittel.
Int jaer VII C ende LXXXII is coninc Widikind van Sassen mit groot volc gecomen uut Denemarcken ende Noorwegen in den landen van Sassen, ende solliciteerde sijn vrienden ende voermaels sijn ondersaten daertoe, dat si den pays ende vrede mit coninc Kaerl gemaect violeren ende breken souden, ende alle sine cappeteinen verjagen. Terwilen dat Widikind dese conspiracie, meuterie maecte, sijn die Slaven gecomen in Hoech-Sassen, ende vernyelden een groot deel des lants van Duringen, mit alle dat lant gelegen tusschen die riviere Sala ende Albia. Coninck Kaerl dit vernemende wert seer toernich, ende vergaerde snellicken een groot heer van volc uut alle sine landen ende provincien, ende maecte daerover die grote ende vrome cappeteinen ende princen, als die prince Adalgijs, des conincs camerling; die prince Gylo, conincstabel; die prince Dyerick, des conincs scencker. Dese comende mit groot volck in Sassen om die Slaven te verjagen, gheboden den edelen van Sassen dat si hem mit dat ander ghemene volc te hulpe quamen. Mer si en wouden daer na niet horen, noch des conincs loftenisse houden, ende sijn gelopen tot Widikind, horen ouden ende eersten coninc oft hertoge, die doe ter tijt sijn tenten opgeslegen hadde onder den berch Gontal. Doe dit die drie voerseyde princen verhoorden, namen si voer hem mittet eerste heer die Sassens te bevechten, ende quamen seer vromelic angedrongen mit groter macht op die Sassens. Ende daer gheviel enen bitteren strijt. Mer int eynde verloren die Fransse den strijt, ende sijnre al ghebleven mit die III princen voorscreven, ende mit noch XX graven, behalven andere edelen, mitter ghemene volc. Ende die andere Franssen die ontgaen mochten, liepen op enen berch, ende des snachts liepen si in die bosscagyen ende wildernissen, ende hebben hemselven also salveert ende onthouden. Ende die coninc Widikind is na den strijt weder mitten sinen in Noorwegen getogen. Die coninc Kaerl dit verhorende, was sere droevich van tverlies sijnre edelre vorsten, ende vergaerde sonder marren alten groten heer van volck, ende is daermede in Sassen gecomen. Daer hem terstont te moete quamen die Angers mit veel andere, die in dese strijt niet geweest en hadden, ende excuseerden hem seer, ende wouden doen al dat den coninc beliefde. Ende mit desen volcke, ende mit sijns selfs volc, ving hi een ontellike grote menichte der Sassenen, die mit Widikind hadden gestreden tegen die Franssen, roepende mit luder stemmen, dat si van hoerre regenten ende oversten hiertoe ghebrocht waren. Waerom dat die coninc vele edelen van den Sassenen gevangen nam, ende brocht se biden riviere Alare, in een plaetse genoemt Ferty, ende deder op enen dach van den princepalen vorsten ende cappeteinen der Sassenen IIII M ende V C onthoefden. In deser manieren heeft die coninc sijn leet ghewroken opten Sassens van tverlies sijnre edelen. Ende is vandaen wederom in sijn lant ghetogen.
Auteursrechtelijk beschermd