Hoe dat coninc Kaerl weder in Sassen toech, ende brocht se mit goeder wisen tot sijnre gehoorsaemheit.
Dat XLVII capittel.
Des sjaerts daeran, van VII C ende LXXXI, int eynde van die meyemaent, is coninc Kaerl mit groot volc weder in Sassen gecomen, ende quam op die plaetse daer die riviere van der Lippe hoer oerspronc nemt. Op welcke plaetse hi tesamen riep ende vergaderde alle die edelen, ouden, regenten, princen ende vorsten dier nacien ende landen, ende tracteerde mit hemluden van den saken ende lasten des rijcs, ende hoe dat si in vreden ende in groten vriheden God souden dienen, ende hem in allen onderdanich wesen. Twelcke si alle mit groter bliscap ontfingen, ende loofdent mit groten swaren ende onbedriechlicken sacramenten ende eede te volbrengen. Op die selve tijt ende plaetse zijn totten coninc gecomen legaten ende ambassiaten des conincs Zijfrijdt van den Denen, mit die van Hongerien, ende begeerden hem te setten in vreden onder des conincs Kaerls macht; denwelken coninc Kaerl mit groter bliscappen ende eren ontfing ende begaefde se met vorstelicken gaven, ende sende se met hoer begeerten weder thuis. Mer coninc Windikind van Sassen en quam daer niet met meer ander princen van Sassen ende der landen ende provincien dairomtrent ge-
Auteursrechtelijk beschermd