Hoe dat die coninc noch een ander strijt hadde teghen die Sassens.
Dat XLV capittel.
Daerna, int jaer VII C ende LXXIX in die lenten, toech die coninck al Francrijck doer, om alle dinc in vreden te stellen. Ende comende int dorp Worcimacum genoemt, quam aldaer tot hem Hildebrant, hertoge van Spoleten, die onlangs tegen den coninc rebelleerde, begerende mit dieper oetmoedicheit remissie ende quijtsceldinge van alle sine excessen ende misdaet, presenterende den coninc sine gehoersamheit mit costelicke ghiften ende gaven, lovende ymmermeer yet te doen tegens den coninc. Die coninc heeften minlicken opgenoemen doer sijn oetmoedich begeren in gracien ende genaden, ende begaefden mit groter giften ende cleinoden, ende heeften weder gesent in Ytalien. Op dese selve tijt begonnen die Sassens weder te rebelleren ende tegens den coninc op te staen. Die coninc dit vernemende, vergaerde weder een groot machtich volc van wapenen, ende is den Rijn over passeert, ende quam in Sassen. Die Sassens ende West-Phalingers verhorende dat die coninc quam, vergaerden allen horen macht van volcke die si mochten, ende quamen tot Bocholt om den coninc te wederstaen ende strijt te leveren. Daer is dat grote heer an malcanderen gecomen, ende sloegen malcanderen so grijsselicken, dat int einde die coninc, overmits vromicheit sijnre mannen, den strijt wan, ende maecte den anderen voervluchtich, soe datter also vele van den Sassens verslagen wert, datmer geen getal of en weet. Hierna dochte die coninc geheel Sassen ende West-Phalen doer te lopen mitten swaerde ende vuere, ende dat verwoesten ende destrueren, omdat si niet meer tegen hem rebelleren souden. Die West-Phalers, die noch te live gebleven waren, kennende des conincx goedertierenheit, sijn mit die oude mannen in hoer hemden gecomen, vallende den coninc oetmoedelick te voeten, begerende remissie ende genade van hoer misdaet, ende beloefden mit vaste eeden ende mit onderpande hoere edelen nymmermeer tegens hem weder te doen. Die coninc uut compassie ende goedertirenheit heeft se in gracien genomen. Diergeliken quamen oec die Angers ende Oest-Phalers oetmoedelick mit tranen, biddende om remissie hoere misdaet, ende hi nam se mede in genaden, op condicien van kersten te worden. Ende die coninc is weder mit al sijn volc na Worms getogen, besettende die stat ende tslot van Heresburch ende Zyburch, mit starcken garnisoene, want hi in meninge was te visiteren die heylige apostelen Sinte Peter ende Pouwels te Romen. Ende reisende aldus doer tlant quam hi dair die riviere van der Lippe hoer oerspronck nempt, ende van daen toech hi int oesteinde van der riviere Onaker, daer hem te moete quam een grote scaer volcx van dien lande, begerende penitencie
Auteursrechtelijk beschermd