Hoe dat die Sassens tegen den coninc weder rebelleerden.
Dat XLIIII capittel.
Hierenbinnen dat coninc Kaerl in Spangen was, vermerende dat heylige kersten gelove, so namen die Sassens voer hem dat si nu enen bequaemen tijt hadden ende oersake hoer leet an den Franssen te wreken, ende quamen over den Rijn mit groot swaer volc in die landen van den Oest-Francken, nyemant sparende man noch wijf, jonck noch out, geestelic noch waerlick, rovende ende brandende kercken ende cloesteren overmits die grote toernicheit ende wreetheit die si opten kersten Franssen droegen ende hadden, ende verwoestentGa naar voetnoot273 ende vernyeldent al mitten swaerde ende viere daer si quamen. Coninck Kaerl uut Spangen gecomen wesende ende dit verhorende, heeft van stonden an een groot machtich heer van Oest-Francken ende Duytschen, ende van West-Francken ende Walen vergadert, ende heeft die mit sinen vromen cappeteynen ende hooftmannen gesonnen in Sassen, bevelende dat si sonder genade dat hele lant souden verwoesten, vernyelen ende destrueren, niemant sparende, man noch wijf, out noch jonck. Dit machtige heer in Sassen comende, vonden daer niemant dan weinich oude mannen, totdat si quamen op een plaetse genoemt Badanvold, daer si die Sassens vergadert vonden in groter menichte by den riviere. Die Fransse heren dit siende, setten hoer volc in goeder ordinancien, ende traden mit vromen moede tegens die Sassens in, die si bina al versloegen, so datter luttel ontquam. Ende sijn weder victorioes ende mit groter triumphen totten coninck gecomen.
Auteursrechtelijk beschermd