Hoe dat die Sassens tot Nymmagen op tslot quamen totten coninc, ende begeerden kersten te worden.
Dat XLII capittel.
Daerna, int jaer VII C ende LXXVII, beval coninc Kaerl dat men dat slot te Nymmagen, dwelck Julius Cesar hadde doen bouwen, gelegen op die Wale, weder soude repareren ende optijmmeren, ende is daer selver in persoen in die lenten gecomen, ende heeft aldaer mit sijn princen den heyligen Paeschdach gehouden, daer oec bi hem gecomen sijn vele princen ende edelen uut Sassen, begerende dat die coninc hen wilde gewaerdigen in den lande van Sassen te comen tot een sekere plaets daert hem beliefde, want si wouden alle te samen dat heylige doopsel ende kersten gelove annemen. Die coninc dit horende is seer verblijt geweest, ende heeft den princen ende edelen van Sassen assigneert een plaetseGa naar voetnoot265 genoemt Paderborne, want daer omtrent vele rivieren, fonteinen ende lopende wateren waren. Die coninc quam aldaer opten determineerden ende ghesetten dach, want daer alle die hertogen, graven, princen, baroenen, ridderen ende edelen van Sassen vergadert waren mit een ontellicke menichte van volc, uutgenomen Windekindus, der Sassen coninc, die uut vresen van coninc Kaerl geweken was tot coninc Sifrijt van Denemarcken. Ende hebben allegader van hoer violeerde ende gebroken loftenisse van den coninc vercregen remissie ende gracie; ende deden hem allen dopen, ende hebben Cristus' geloef angenomen, renuncierende ende daeronder te pande settende alle hoer eeldom, vrijheden ende goeden, indien sij ijmmer meer van den kersten gelove ende des conijncs gehoersamheit vielen ende ofgingen. Ende die coninc ordineerde tot Paterborne een biscoplicke stoel, ende gaf hem een geleert man, die se mit predicatien, leringen ende duechtlike exempelen instrueren ende vestigen soude.
Auteursrechtelijk beschermd