Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Sassens mit horen conick Windikindi weder tegen coninck Kaerle rebelleerden ende opstonden.
Dat XLI capittel.

Coninc Kaerl aldus in Italien overmits rebelheit ende ongetrowicheit des hertoechs Rutgaudts becommert wesende, hebben die Sassens doer raet ende ingheven hoers conincx Windekindi, die verdreven was, weder ingenomen die stat ende tslot Heresburch, ende

[p. 67v]

Syburch, ende hebben alle des conincx soudenieren ende knechten verslagen ende verdreven. Dit vereysschende die coninc, heeft weder een generale dachvert gehouden tot Vorms sijnre heren ende princen, ende isser medegecomen bi die twe fonteinen, daer die riviere van der Lippe hoer oerspronck neemt, daer hi die Sassens recht als een sware ende onversien tempeest overviel, ende brocht se daertoe dat si beloofden alle hoer afgoden te breken ende dat heylige doopsel ende tkersten gelove an te nemen. Ende daer worter vele in tegenwoerdicheit des coninx sonder getal gedoopt. Ende als die coninc die stadt Heresburch weder gerepareert ende vernyewet hadde, ende bi die riviere van der Lippe een nijen²⁶⁴ slot gebouwet, ghetymmert, mit sijn ghetrouwe knechten ende soudenieren dat wel versien ende beset hadde, is hi victorioes van dan getogen, ende bleef in den burch Heristael genoemt.

264 nijeu AB.